Mañan ta wordo celebra Dia di Prensa na Aruba y tambe den otro islanan di nos region. Na mi coleganan den prensa, masha pabien. Hopi perseverancia den e noble y bunita profesion aki cu ta uni nos.

Igualmente ta bon pa expresa palabra di gratitud na tur instancia y hendenan cu di un forma of otro ta duna reconocimento y balor na e trabou cu e miembronan di prensa ta realisa. Un trabou cu sigur no tur biaha ta bon mira ni aprecia. Specialmente ora cu denuncianan ta wordo haci cu ta mishi cu e sensibilidad di personahenan of instancianan publico y no publico.

Acceso na informacion
No ta facil eherce e trabou di prensa den un comunidad chikito manera Aruba, caminda un ta conoce otro, y sigur unda tin lasonan di amistad y familiaridad cu otro. Pero tambe pa no cay den tentacion consciente of inconsciente di cualkier sorto di interes cu no sea e bienestar comun.

Ta eynan unda e sentido etico di e miembro di prensa mester prevalece riba cualkier interes of preferencia, fundamentalmente pa realisa bo trabou di un forma mas imparcial posibel.

Cada dia trabou di prensa ta trece cune desafio, sigur si como profesional den prensa bo kier eherce e derecho di libertad di prensa di un forma serio y responsabel. Kiermen eticamente pa salvaguardia e derecho cu nos tur tin pa acceso di informacion confiabel y berdadero.

Pero como periodista pa bo por tin acceso na informacion confiabel y berdadero, bo mester tin fuentenan di informacion clave y creibel. Fuentenan di informacion cu tin disponibilidad pa asina e periodista por tin acceso pa obtene y/of verifica su informacion.

E accesibilidad di fuentenan cu e caracteristicanan aki ta haci nos trabou mas dificil na Aruba. E periodista mester ta un persona hopi habil pa por tin acceso na cierto informacion di interes pa nos comunidad, specialmente si ta trata di asuntonan controversial di diferente indole.

Tin biaha como periodista bo ta bati e porta di e PR of vocero di un instancia, ya sea pa obtene of verifica un informacion, y bo no ta haya reaccion, of e informacion duna ta insuficiente of pober. Of simplemente nan ta remiti bo na e doño di curpa kende sigur y logicamente lo nenga cualkier acusacion.

Tin biaha bo ta haya cierto ‘tip’ cu eventualmente por resulta berdad, pero eticamente como periodista, bo ta abstene di bin cu ne, ya cu bo no por haya un fuente fidedigno pa confirme. Un actitud cu ta contra di tur derecho na informacion y contra e deber sagrado na libertad di informacion consagra den e derechonan humano y den nos constitucion.

Fuente di informacion
E echo aki ta transporta mi na tres aña pasa, ora cu e compania di utilidad Elmar a organisa un actividad di contenido pa celebra Dia di Prensa. Por cierto, masha poco actividad di contenido ta wordo organisa pa nos gremio, pero tampoco nos gremio mes no ta organisa eventonan pa reforsa nos conocemento y sentido etico. Mas tanto nan ta actividadnan social y recreativo.

Dos aspectonan a keda refleha durante e lectura “Media, Etica y Derecho,” duna magistralmente pa rector di Universidad di Aruba, Glenn Thodé, dia 1 di September 2016, y cu a conta cu e participacion di un grupo di coleganan den prensa. E dos aspectonan aki tin cu haci cu nos legislacion ta garantisa e ehercicio liber di prensa na Aruba. Pero tambe e proteccion di nos ciudadanonan pa e trabou responsabel cu prensa mester realisa den su tarea pa informa nos comunidad.

Den su disertacion e academico a indica cu prensa ta un di e pilarnan di un pais democratico y mester garantisa e ehercicio liber di e trabou di medio di comunicacion.

Igualmente sr. Thodé a cita nuebe principio pa sigura e ehercicio liber di prensa, algun di nan ta: Prensa mester informa e berdad. Prensa mester trece su informacion den un forma husto. Pero igualmente proteccion di e fuente periodistico ta un principio pa sigura e ehercicio di libertad di prensa.

E biaha ey e punto aki di fuente di informacion a hala basta atencion, y te hasta a wordo treci dilanti casonan di acceso na informacion pa via di algun hende cu ta drop den post box, sin cu e periodista sa for di ki fuente el a bini. Riba e punto aki Sr. Thodé a laga sa cu den un caso asina “mester tin espacio pa verificacion”. E aspecto crucial y etico aki, ma trece dilanti na e inicio di e articulo aki.

Tambe un punto importante cu e hurista y academico aki a trece dilanti ta, e falta di un legislacion di prensa na Aruba. Ta asina cu si hues no tin un ley specifico pa atende cu un caso, e por aplica tratadonan y convenio a base di analogia di casonan similar. El a yega di menciona cu ta existi tratado y convenio internacionalmente reconoci manera e declaracion di principionan di prensa di IFJ (International Federation of Journalists).

Recientemente den corte a cay un sentencia contra algun miembronan di prensa pa e forma con nan tabatin acceso na cierto informacion di suceso pa realisa nan trabou. Nan a wordo acusa di malversacion di Tetra-radio di polis, ‘tab’ y retransmiti informacion cu nan no mag di scucha.

Un caso controversial cu tin diferente angulo ya sea politico, competencia periodistico, etico, huridico, etc.. cu a conduci cu algun di nos coleganan den prensa a haya e condena mas halto di trabou pa comunidad y si no, nan lo bay cera.

Un condena cu na mi humilde opinion ta crea un precedente y ta debilita e acceso y proteccion na e fuente di informacion. Pero tambe e posibilidad pa prensa por busca informacion, y asina nan por cumpli cu su responsabilidad pa eherce e derecho di informacion cu cada miembro di nos comunidad tin como un derecho fundamental.