WILLEMSTAD- Den un comunidad chikito manera Corsou ta dificil pa aspira pa periodismo completamente independiente. Dificil si, pero no imposibel. Riba esaki tur miembro di panel tabata di acuerdo durante un celebracion di e di cinco aña di existencia di Ret Karibense na Corsou.

Periodistanan Jo Anne Da Costa Gomez (TV DIRECT), Oscar van Dam (ANP, Extra, Paradise FM), Yves Cooper (periodista independiente) y Mavis Albertina (Nos Pais TV) durante e discusion di panel a laga nan luz briya riba e calidad di medionan di comunicacion – media – na Corsou. Y aunke den nan argumentonan cada un di nan ta hinca nan propio matis, den liñanan grandi nan ta di acuerdo cu otro.

Asina na tur ta reconoce cu ta dificil pa keda obhetivo riba un isla cu solamente 160 mil habitante. Noticia masha lihe ta toca amigo, famia of otro conoci. Pasobra tur media ta comercial, e doño di e propaganda tin hopi influencia. Y no ta un excepcion cu e doño di un medio mes tambe ta traha na redaccion, loke por trece conflicto di interes.

Keynote speaker y investigado Renske Pin ta papia tocante e conclusionnan di investigacion anterior di independencia di media na Corsou.

Bon periodismo contra mal periodismo
Unesco y Transparancy International a toca problema asina caba den e rapportnan cu nan a presenta na 2013 y 2016. Pero durante e encuentro a resulta cu a haci masha poco cu e recomendacionnan. Toch e miembronan di panel – cu mes ta bisa cu nan ta aspira independencia – tin curashi pa soña di un ambiente periodistico miho.

Cu excepcion di un: Yves Cooper, cu pa e motibo ey a bira periodista independiente. E ‘mal periodismo’ segun e, a gana e lucha di e bon. Y segun Cooper mes, el a acepta esaki. “Media ta depende di entrada di propaganda. Media periodistico a bende nan integridad na comercio”, e ta bisa cu sertesa durante e encuentro. Esaki ta segun e fuente Retkaribense.

No ti censura
Oscar van Dam no ta bay contra dje, pero alabes e ta bisa si cu e ta mira un banda completamente diferente di e medaya. “Mi experencia ta cu hopi periodista ta traha masha duro pa trece noticia. Kisas tur hende no ta obhetivo semper. Pero danki dios nos tin e posibilidad pa como prensa trece loke nos ke. Sigur no tin censura.”

Mavis Albertina di Nos País TV ta menos pesimista. Segun e periodismo independiente obhetivo na Corsou por existi masha bon. “Si bo tin integridad y si hende confia bo”, e ta pone como condicion. Hende mester sa cu bo ta cumpli cu bo palabra. Y si esey ta cla, nan no tin nada mas di duda. Nan ta join bo di mes.”

Circulo vicioso
Segun Jo-Ann Da Costa Gomez e cos no ta asina simpel. E ta menta algun circulo vicioso ‘cu media na Corsou no ta logra sali afo’. Manera e pedido y oferta di noticia – “Hende gusta ora periodista haci pregunta sugestivo.”Ta prensa mes a reforsa e mal nomber ora nan papia malo di otro den nan noticianan. Anto tin tambe e crecemento di social media cu ta duna fake news un podio.

Si ta na Da Costa Gomez mester kibra e circulonan ey prome. E ta join un di e recomendacionnan cu UNESCO a haci caba na 2016: Uni periodistanan. “Pa crea un sorto di ‘codigo di conducta’ y motiva otro miembro di prensa pa tene nan mes na esaki. “Cu un ‘bloke combativo grandi’ cu ta para pa balor periodistico un cambio por djis cuminsa sosode, Da Costa Gomez ta bisa cu speransa.