Den un edicion di Bon Dia Aruba na luna di october ultimo, a trece dilanti un noticia relaciona cu scol pa muchanan special, un cu a resulta destacando con importante periodismo ta pa comunidad y hunto cune, un ayudo hopi grandi pa un mama.

Tabata trata di un caso specifico, na unda e mama a conta cu na Aruba tin hopi mucha special, pero e tambe a trece dilanti e parti di educacion cu mester existi di parti di mayornan y di parti di juffrouwnan na scol. Esaki ta pa motibo cu mester siña muchanan desde chikito cu ora nan ta mira un mucha cu condicion special no mester actua di manera distinto, ni haci bullying cu nan. E ta haya cu algun mama ta siña nan yiu actua di manera malo.

Ricky, su yiu homber, ta un persona di 18 aña cu tin un condicion special. Ora el a nace pa via di Forceps loke a causa un daño celebral hopi grandi mes, su mama a declara cu door di su condicion ora nan ta sali nan ta haya reaccion di hende rond di nan, e mayoria ta un reaccion cu por wordo considera como incomodo.

Na e momento ey, el a conta cu ora su yiu tabatin 15 aña a haya un yamada for di su antiguo scol pa motibo cu Ricky no por a sigui den scol ey mas. Den su situacion nan no por a haci mucho cune, pa via cu e no ta laga hende mishi cune y mester di atencion special pa cambia su paña y pampers.

Cuminsa educa na scol ta loke e mama ta pidi pa cuminsa stop e bullying contra muchanan special, un parti cu a wordo destaca den articulo menciona caba cu door di su publicacion, e dia despues el a haya un yamada na unda a informa cu su yiu por wordo ricibi na un scol adapta pa e necesidadnan di dje y di su yiu.

Su mama a comenta cu aunke na e momentonan aki Ricky no ta bayendo scol pa motibonan di salud di dje, e ta espera cu ora e lo wordo recupera Ricky por sigui conta cu su scol nobo.

Loke ta importante pa destaca den articulo aki ta e importancia y influencia cu periodismo tin den sociedad, pa via di un publicacion cu nos redaccion a wordo treci dilanti Ricky y su mama a haya oido y atencion pa loke ta trata un bida miho pa nan.

Periodismo ta e manera con tur tipo di informacion ta yega na nos cas, articulonan cu ta forma parti di e bida diario cu ta tuma luga tanto den pais aki como na otro luganan rond di mundo, pero pakico ta importante? pa motibo cu ta wordo considera como un registro historico, como expresion di e sociedad, como desaroyo di conocemento y tambe pa motibo cu ta establece e libertad di e personanan y di sociedadnan.

Pero un rason hopi conoci y no menos importante ta cu, ta sirbi como un canal di expresion di e sociedad, ta haci impulso di cambionan den historia y den comunidad mes, manera a sucede cu e historia di Ricky y su mama.

Ta existi hopi hende den comunidad cu ta cuestiona e trabou periodistico na Aruba sin cu nan sa cu esey ta un base di e libertad di un pais, un sociedad no por ta liber si no ta conoce e realidad di loke ta sucede.

Como un manera di documentacion, acoso moral di prensa di Merca a causa e caida di un presidente, ta pensa cu sin e accion eficaz di esunnan cu ta profesional den area di informacion e retiro di e presidente ey no por a tuma luga. Tabata un episodio cu a haci historia, y a tuma consenshi di loke e ‘cuarto poder’ -manera prensa ta conoci- tin di importante como e opinion publico cu ta wordo genera pa medionan di comunicacion social.