(Infobae) – Gobierno di Rio Grande do Sul, esun di mas golpia pa awasero cu ta asota sur di Brazil, diahuebs ultimo a evalua na 18.839 miyon real (casi 3.663 miyon dollar) e necesidadnan pa asina por recupera di e inundacionnan di e ultimo siman.

E balans preliminar di necesidadnan, presenta pa gobernador Eduardo Leite, ta inclui necesidadnan financiero pa respuesta di emergencia y asistencia na e victimanan, asina como tambe e recuperacion y reconstruccion di infrastructura y apoyo na economia local.

Entre otro capitulo, a calcula cu ta bay ta necesario pa inverti 966 miyon dollar pa recuperacion di viviendanan y destina 513 miyon dollar pa scolnan.

Pa loke ta trata recuperacion di careteranan y camindanan urbano, e necesidadnan ta di 553 miyon dollar y e reconstruccion di brugnan cu 701 miyon dollar.

Di mesun manera, tin planea destina 197 miyon dollar pa apoya companianan y otro 71 miyon dollar mas pa agricultura, un di e sectornan mas relevante den region aki, cu ta un productor importante di aros, soya y maishi.

Gobierno regional tambe a anuncia e apertura di un linea di credito di casi 1.360 miyon dollar cu interesnan abou pa asina apoya empresanan localnan.

Di forma paralelo, presidente Brasileño, Luiz Inacio Lula da Silva, diahuebs ultimo a anuncia un pakete di ayudo di 9.800 miyon dollar pa yuda estado di Rio Grande do Sul.

E ayudo aki ta inclui subsidio directo, credito y descuento tributario y ta supone cu ta e prome pakete pa contribui na e reconstruccion di e region.

Inundacionnan y teranan cu a los a afecta cerca di 425 municipio na Rio Grande do Sul, alcansando directamente 1.5 miyon hende y cu te awor, a laga 108 fayecido y cerca di 130 persona desaparecido.

Segun un ultimo balans oficial, 232.675 persona ta permanece desplasa di nan hogarnan, entre nan 65.573 ta kedando den refugio.

E situacion mas preocupante ta sucede na zona metropolitano di Porto Alegre, na unda ciudadnan y barionan henter a keda bao awa for di diabierna di siman pasa, y tin problemanan di abastecemento di awa y cortenan di coriente.

E responsablenan principal di institutonan meteorologico y geologico di e pais a reuni diahuebs ultimo pa analisa e riesgonan cu e frente friu nobo ta bay trece na Rio Grande do Sul, un estado castiga pa tormentanan di siman pasa.

Den un comunicado di Instituto Nacional de Meteorologia (Inmet) y otro centronan di e pais, a confirma e pronostico cu for di e fin di siman aki e sistema frontal ta bay yega na e region central di e estado, generando condicionnan pa e situacion actual bira pio.

“Entre diabierna y dialuna, yobidanan ta bay ta mas intenso na estado, incluyendo e region metropolitano di e capital Porto Alegre, e yobidanan den periodo aki lo por surpasa 150 millimeter, condicion cu lo por bira pio e situacion mas ainda.”

E documento tambe ta adverti riba teranan cu ta los, specialmente den areanan afecta pa tormentanan di siman pasa.