Mas tanto, ora un caso hudicial hala atencion publico grandi ta pasobra ta trata di un caso grandi. Nos ta haya nos awor cu e fenomeno di un caso futil, cu por a keda regla hopi dia caba, pero pa un of otro motibo como un luna y mey despues di e sucedido porfin Ministerio Publico a haya ta bon pa atende e asunto. E mero hecho cu un yiu di nos actual ministro presidente ta envolvi ta duna e asunto un toque special. Sin embargo, ta trata di nada mas cu un intercambio di palabra entre hende hoben cu no gusta otro, cu a termina den bringamento y destruccion den un restaurant, ademas di a herida un empleado di un di e establecimentonan unda e bochorno a tuma lugar. Si tabata otro hende, probablemente autoridadnan hudicial a haci inmediatamente loke a sucede ayera, esta cu a duna orden di aresto pa un persona pa cada banda di e asunto, pa por saca afor kico realmente a tuma lugar. Pero no, un di e sospechosonan, laga nos yama nan asina, mester a haya tempo pa e bay atende asunto social importante, manera un boda y sucesivamente biahe di luna de miel, pa finalmente awor mester cana e proceso hudicial cu obviamente a keda tranca pa tanto tempo, sin un motibo valido.
Nos no ta bay specula ki papel e importancia di su famia tabata pa e detencion no tuma lugar na november caba, y mester a warda te awor. Tampoco nos ta bay specula ki papel nos ministro presidente a hunga den esaki;na su nivel di responsabilidad ta presumi cu el a laga husticia haci su trabao. Pero esey ta yama otro pregunta: pakico anto un simple pelea ta tuma seis siman pa haya atencion di esnan cu mester a atende e asunto desde promer dia? Mientras tanto, awor e unico cos cu ta importante ta cu autoridadnan hudicial haci nan trabao, atrasa misteriosamente,tan pronto posible y pa pone e asunto aki tras di lomba, pasobra e pais aki tin cos mas importante pa maneha. Manera un situacion di salud cu ta bay costa nos bastante. Actualmente nos ta figura entre e paisnan cu mas contagio di Covid-19, cu un tasa di riba 41.000 caso activo pa cada 1 miyon habitante. Pa haci un comparacion cu Hulanda; aya nan tin actualmente alrededor di 450.000 caso activo, cu ta mas o menos 26.500 caso activo pa cada miyon habitante. Pues nos situacion no ta nada di gaba, aunke hospitalisacion ta ainda dentro di parametro aceptable. Sin embargo, e hecho cu tin tanto hende afecta cu no por traha, tin su efecto riba operacion di hopi empresa. Practicamente nos ta yegando na como 10% di e forza laboral cu ta fuera di combate como pacient, na hospital tambe entre otro, sin conta aden e personanan den e hogarnan afecta cu tampoco ta liber pa move pasobra nan ta den cuarentena.
Banda di tur esaki tin asunto realmente di peso supuestamente riba agenda. Dia 21 di januari ta programa reunion di Conseho di Ministro di Reino pa dicidi kico ta bay pasa cu e apoyo di liquidez cu e islanan por haya. Pa loke ta Aruba e asunto no ta pega riba e reduccion di e famoso 12,6%; aki ya por a comprende di e reaccion di gobierno Hulandes y di e consehero di Reino CAft cu esey no ta bay sucede. E punto hopi mas importante ta e leynan di Reino, pa Aruba esun di supervision financiero y esun di e organo ehecutivo pa ehecuta e programa di reforma acorda, COHO. No a duna un splicacion debido na pueblo ni parlamento, ni mucho menos a tramita e aprobacion cu Hulanda ta desea pa por sigui cu e proceso legislativo den Tweede Kamer. Si e asunto sigui manera e ta, cu e islanan trancando e proceso no tumando un decision di aprobacion, esaki lo tranca e proceso di apoyo financiero, pero lo tin otro consecuencia tambe. Ta parce cu nos ta lubida, cierto di nos en todo caso, cu nos ta caba den un proceso di supervision financiero, y cu no tin sentido di purba desvia e asunto por medio di triki pa tarda o tranca e proceso. Esaki a sucede anteriormente caba y e resultado tabata cu Hulanda a dicidi di actua via e protocol di november 2018 y e ley local di supervision, sin e cambionan acorda. Awor, nos por tin hende cu por kere cu, si no tin un protocol vigente mas, ni ley di Reino di supervision, cu nos ta liber pa cana nos mes caminda, ‘como nos de la gana’… Esey lo no ta e caso, pasobra e decision ta tuma na 2014 caba, y vocifera pa un representante Hulandes, cu a bisa bon cla “cu Hulanda no ta bay tolera cu un isla ta pone cara di Reino na berguenza den ambito internacional”. E decision a cay casi 8 aña pasa cu maneho financiero di e isla Aruba lo mester mehora, ‘por la buena o por la mala’. No mester lubida cu na ultimo instancia, no ta gobierno di Aruba ta responsable pa nos bienestar como ciudadano Hulandes. Falta apenas dos luna pa yega na dos aña cu e pandemia a tumba nos. Si nos mira loke a sucede te awor pa reforma structuralmente, esaki ta nada mas cu un berguenza.
