Pepsi, Unilever, y Nestle tin plan pa cuminsa ofrece nan productonan mediante un sistema di entrega di subscripcion cu un twist clave: e empakenan lo ta reusabel.
E servicio, yama Loop, lo lansa cu 25 socio di nomber conoci, y ta spera di destaca mediante ofrece un opcion mas sano pa medio ambiente cu su plan di suscripcion. Loop ta compara su servicio na esun di e lechero. Mesun forma cu e lechero tabata entrega lechi fresco, y despues tabata pasa busca e boternan despues cu hende a consumi e contenido, Loop lo tin chauffeur di UPS entrega un saco reusabel cu varios producto den dje. Unabes nan a wordo uza, e consumidonan por pidi pa e containernan uza wordo busca bek, y pa trece containernan nobo. Loop lo maneha e aspecto di limpiesa y reuzo di e empake.
E servicio lo mester lansa na partinan di Paris, New York, New Jersey y Pennsylvannia na mediadonan di mey. Loop tambe tin plan pa prepara entrega pa London mediante Tesco e aña aki, y tin como meta pa lansa na Tokyo na 2020. Pa awo, e ta cuminsando cu un test chikito di usuarionan. Cada marca a diseña nan propio empake pa uza cu Loop, pa asina tene nan mes na e imagen di e compania, mientras e empake ta reusabel. Algun productonan di Unilever ta spera di dura ocho aña, segun e Wall Street Journal.
E productonan lo costa casi igual cu e containernan di uzo unico, pero hende lo mester paga un deposito di e containter entre $1 y $10, y entrega lo cuminsa na $20, pero ta baha cu cada producto cu ta pidi.
Ta un bunita idea, cu ta fit cu e empuhe pa stop di uza plastic desechable. Si e servicio ta conveniente, lihe, y no hopi caro, por spera cu hende lo haci uzo di dje pa e bon di nos planeta.
