Un agencia vigilante di gobierno a bisa ayera cu e proceso di Pentagonan pa otorga un contract altamente lucrativo di cloud computing na Microsoft tabata den linea cu standard legal y di compra di gobierno.
Inspector general di Departamento di Defensa no a haya evidencia di interferencia di Cas Blanco den e proceso di otorga contract. Pero e reporte ta bisa cu investigadonan no por a revisa completamente e aspecto aki di e asunto, pasobra Cas Blanco no ta permiti acceso liber na testigo.
E contract, potencialmente na balor di $10 miyon, a ser otorga na Microsoft october ultimo, impulsando su competido tecnologico Amazon pa acusa di mal actuacion.
Amazon Web Services, un lider den mercado di provee servicionan di cloud computing, pa largo a ser considera un candidato lider pa maneha e proyecto di Pentagono, Joint Enterprise Defense Infrastructure conoci como JEDI. E proyecto lo warda y procesa cantidad grandi di datonan clasifica, permitiendo militar Mericano pa mehora comunicacion cu soldadnan riba campo di bataya y usa inteligencia artificial pa agilisa su planeamento di guera y capacidad di lucha.
Amazon a demanda Pentagono despues cu Microsoft a gana e contract. Trabou riba e proyecto a stop mientras e demanda ta den proceso. E hues presidiendo riba e protesta di oferta na Corte Federal Mericano a bisa na maart cu e reto di Amazon probablemente tabatin merito riba algun base tecnico involucrando prijs.
E revision revela ayera pa inspector general di Departamento di Defensa no a duna un conclusion si apropiadamente a declara Microsoft como e ganado. Na luga di esaki, a mira si e proceso pa tuma e decision tabata apropia y legal. Tambe a examina acusacion di comportamento inetico di oficialnan di Pentagono involucra den e asunto y generalmente determina cu cualkier fayo etico probablemente no a influencia e resultado.
E revision tambe a busca determina si Cas Blanco a influencia e decision di Pentagono, segun Amazon a acusa. E reporte a bisa cu maske ta parce cu no tabatin presion asina di Cas Blanco, e team no por a determina definitivamente e grado completo di interaccion di Cas Blanco cu esunnan cu a tuma decision di Pentagono.
“Nos ta kere cu e evidencia cu nos a ricibi ta mustra cu personal di departamento di Defensa cu a evalua e propuestanan di contract y duna Microsoft e contract JEDI cloud no tabata presiona pa ningun lider di departamento di Defensa mas senior riba nan, kende por a comunica cu Cas Blanco”, e reporte ta bisa.
Amazon a sigura cu e proceso tabata influencia di forma inapropia pa e disgusto di presidente Donald Trump pa Amazon y su CEO, Jeff Bezos. Bezos ta doño di The Washington Post, un portal noticiero cual Trump frecuentemente ta critica.
Project on Government Oversight, un grupo vigilante priva, a bisa cu tabata alarma pa e uso di Cas Blanco di privilegio presidencial pa limita acceso di inspector general na informacion di testigo.
“Privilegio ehecutivo ta diseña pa protege siguridad nacional y combersacionnan candido di e presidente cu su conseheronan cercano, no pa blokea oficialnan di agencia di discuti un contract grandi di gobierno cu no tin mester di decision presidencial”, abogado top di e grupo, Scott Amey a bisa den un declaracion.
Vocero di Pentagono, Lt. Col. Robert Carver, a bisa cu e reporte di inspector general ta mustra cu e proceso di otorga contract tabata husto y legal. “E reporte aki mester finalmente cera e porta pa atakenan impulsa pa medionan di comunicacion y corporacionnan riba oficialnan di carera di procuracion kende ta trahando sin descanso pa haya e ambiente hopi necesario di JEDI cloud computing den man di nos luchadonan den linea frontal mientras ta continua protegiendo ciudadanonan Mericano”, Carver a bisa.
