Tur siman nos ta publica e resultadonan di un poll riba un ponencia hunto cu un splicacion neutral di e topico. E poll aki por haya riba nos website BonDia24. com. Den e matrix bo por mira kico e partidonan politico participando den e eleccion 2017 ta vota. Riba nos Facebookpage nos ta publica e videonan di tur partido unda nan ta motiva nan contesta di si of no riba
cada ponencia.
Un persona di exterior ta bin biba na Aruba como pensionado. E ta proba cu e tin un entrada di por lo menos Afl. 100.000 pa aña, y desde e momento cu e ta registra legalmente den Registro Civil, e ta cubri pa tur gasto medico via AZV. Esaki ta loke ley ta ordena awor, cu tur ‘residente’
tin cobertura.
Esaki por trece riesgo considerabel pa nos sistema di seguro. Hende di edad tin relativamente mas problema di salud compara cu hende hoben, y tambe mas problema grave cu ta
costa hopi placa. Cu tanto entrada cu nan tin, nan lo mester por paga un seguro internacional pa nan mes? En todo caso lo mester por evita cu hende ta bin Aruba pasobra
nos sistema medico ta brinda nan mas proteccion cu esun di nan pais. Otro caso ta e caso di personanan cu ta bin traha na Aruba. Como cu mayoria di nan ta bin traha aki den e trabaonan menos bon paga, nan primanan paga pa AZV no ta acumula na tanto. En todo caso e gastonan ta hopi mas halto cu loke nan ta contribui.
Ta posibel pa, por ehemplo, den e prome periodo cu nan ta aki, laga nan mes paga nan seguro? Loke nos ta describi aki como ponencia, tin otro aspecto tambe cu mester considera.
Ora un pais laga otro hende drenta legalmente, o hasta ilegalmente, den su teritorio, e pais ta responsabel pa nan bienestar. Un ehemplo ta cu ora un trahado ilegal haya un accidente na trabao, y no ta sigura, e pais ta responsabel pa tur e gastonan medico. Tambe mester tuma na cuenta cu esunnan di e profesion medico humanamente no por nenga tratamento na un persona di exterior. Tumando tur esaki den consideracion, bo ta haya cu Aruba mester duna e trahado/pensionado di exterior acceso na AZV mesora cu nan registra aki?
