E forma legal di union civil (geregistreerd partnerschap) cu proximamente lo wordo trata den parlamentoy cu lo ta habri tanto na parehanan hetero como pa parehanan di mesun sexo, no lo brinda beneficionan manera subsidio di viudez (weduweuitkering), reglanan regardando impuesto, pensioen y herencia. Riba recomendacion di Corte Comun (Hof), gobierno lo bay implementa esakinan despues.

Recientemente Bon Dia a haya e proyecto di ley (Ontwerp Landsverordening, OLV) regardando e ordenansa di implementacion (invoeringsverordening) y ampliacion di e cambionan riba codigo civil cual parlamento a aproba riba 8 september di 2016. Nos a tuma contacto cu parlamentario independiente Daphne Lejuez pa sa mas di e tema mirando cu presidente di parlamento lo ta yamando un reunion pronto y e parlamentario independiente a facilita nos e documentacion.

Den e ley aki (ordenansa) pa implementa e cambionan cu a wordo aproba riba 8 di september 2016 ta regla e consecuencianan legal y beneficionan di union civil (entre un cantidad di otro cambio), manera docente hefe di derecho priva na Universidad di Aruba a skirbi den 2017 y manera Bon Dia a subraya recientemente den un articulo.

Den e propuesta di gobierno cu aworaki ta pendiente pa presidente di parlamento yama un reunion pa trat’e, a dicidi pa haci un distincion entre derechonan fundamental (core rights) y derechonan supletorio (supplementary rights). Esaki den cuadro di un conseho di Corte Comun.

Hof: Derechonan fundamental ta propiedad, alimentacion y herencia

Maske e conseho aki no a wordo entrega na parlamento, gobierno a menciona e puntonan mas importante den nan nota di splicacion riba e ley. Kico ta e derechonan fundamental ora ta trata di derechonan pa personanan cu kier drenta den un union civil como alternativa pa matrimonio (pa parehanan hetero y homo), gobierno ta splica den liña di Hof su conseho. Akinan ta trata di derechonan di propiedad dentro di relacion (relatiegoederenrecht), derecho di alimentacion despues di separacion y derechonan di herencia.

E derechonan di propiedad dentro di un relacion ta wordo regla por medio di declara e titulonan di codigo civil cu ta aplicabel na matrimonio (6, 7 y 8) aplicabel pa union civil tambe. Siguientemente derechonan di alimentacion ta wordo regla den articulo 1:166b y 1:166c.

Mientrastanto, aunke Hof ta menciona cu derecho di herencia ta un derecho fundamental, Hof ta propone pa laga e personanan cu drenta den union civil laga registra nan derechonan di herencia via un testamento.

Hof ta conseha pa implementa derechonan supletorio “despues”

Banda di e derechonan cu lo wordo implementa cu e propuesta di ley aki, Hof ta propone pa implementa e derechonan cu no ta cay bou e derechonan fundamental despues di haci un inventarisacion. Kico precisamente Hof of gobierno kiermen cu un inventarisacion, y kico lo wordo inventarisa, no ta wordo splica.

Bou e derechonan supletorio, gobierno ta nota cu lo cay derechonan di famia relaciona cu mucha, custodia riba mucha, asuntonan fiscal (impuesto) y aspectonan cu tin di ber cu servicionan social (sociale voorzieningen).

Hof ta haya cu por implementa derechonan fundamental sin esunnan supletorio

Gobierno ta skirbi den nan splicacion riba e proyecto di ley, cu Hof ta haya cu por implementa e derechonan fundamental sin esunnan supletorio pa asina cumpli cu e exigencia di e hurisprudencia di Corte Europeo di Derecho Humano (CEDH) den caso Oliari v. Italia.

Consecuentemente gobierno ta menciona cu Hof a conseha pa laga implementa e proyecto di ley den su forma actual mas pronto cu ta posibel pa asina e cambio di e codigo civil bira realidad, por lo tanto sin desaroya union civil mas den e proyecto di ley aki.

Gobierno: Unionnan civil cu mester derecho supletorio por bay hues

Gobierno den su nota ta sigui splica cu e conseho di Hof concretamente ta encera cu e derechonan fundamental lo mester wordo implementa, cual gobierno a bisa ta implementa den e propuesta den titulo 1.5A y 1.9A. A sigui menciona cu den liña di Hof su conseho, gobierno a dicidi pa sigui desaroya e derechonan mara cu union civil na otro momento por medio di un otro ley di implementacion.

Sigui e conseho di Hof ta implica cu e derechonan supletorio lo wordo implementa “despues”, segun gobierno. Den e nota ta bisa cu si un pareha den un union civil na cierto momento wordo afecta negativamente pa e echo cu nan no tin cierto derechonan supletorio, un hues lo por brinda un solucion den un caso concreto.

Click AKI pa wak e documentonan oficial di e articulo aki.