Awe, dia 30 di december, pensioen di biehes ta aumenta cu 2.4%, segun Gabinete demisionario Wever-Croes II a informa mediante un comunicado di prensa.
Segun e comunicado, cu e aumento aki Gabinete Wever-Croes ta cumpli cu aumenta e suma di pensioen pa di 5 biaha den ultimo 7 añanan cu ta periodo di Gabinete Wever-Croes 1 y 2. E aumento den e ultimo tempo aki tabata mas di 400 florin, cu ta representa casi 20% di aumento. E aumento aki ta basa riba e posibilidad den ley cu por duna indexacion di e pensioen cada aña.
Prome Minister demisionario, Evelyn Wever-Croes a anuncia den su discurso nacional na comienso di luna, debi na algun logro clave cu tabata posibel danki na e espacio financiero cu Gabinete Wever-Croes a crea, Gobierno a pone prioridad pa pensionadonan.
Cu e espacio financiero, a cuminsa duna back na pensionadonan, door di e aumento di pensioen di biehes y e aumento di reparatietoeslag 4 biaha caba den e ultimo 7 añanan. Y Entrante 1 di januari 2025, e pensioen di biehes ta bolbe subi cu 2.4%. Pensionadonan ta cobra esaki dia 30 di december. Den total e pensioen cu nos grandinan ta ricibi a subi cu mas di 400 florin den e ultimo 7 añanan. Esaki lo sigui subi den e añanan nos dilanti, na forma responsabel, segun e comunicado ta indica.
“Gabinete Wever-Croes a traha duro pa crea un espacio financiero despues di tur reto di e ultimo añanan. Y awo ta e momento pa nos duna back na esnan cu a contribui asina hopi na crecemento di Aruba. E aumento di pensioen ta un ehempel di con nos ta inverti den futuro di nos ciudadanonan. Y di nos compromiso pa garantisa cu nos grandinan, cu a construi e pais aki, por gosa di nan biehes cu dignidad y felicidad”, Prome Minister a expresa.
