“2015 a caracterisa su mes como un desaroyo positivo di un di e fondonan mas importante pa nos comunidad cu ta e fondo di pensioen di behes”, asina director di Banco di Seguro Social (SVb), sr. Edwin Jacobs a declara na Bon Dia Aruba.
Actualmente e desaroyo di e fondo di behes ta asina positivo cu pa cu otro aña nan lo tin espacio pa duna un aumento cu lo ta un tiki mas di locual ta e perdida di poder di compra. E adaptacion aki ta manera ley ta stipula cu SVb mester tene cuenta cun’e.
E adaptacion aki lo drenta na vigor entrante 1 di januari 2016. Sinembargo e bon noticia pa nos pensionadonan ta cu sr. Jacobs a bisa cu ya den e pensioen di januari cu ta wordo paga 31 di december awor, nan lo por mira aumento caba den dje.
Director di SVb a splica cu e ley ta prescribi cu (aunke no mester) bo por adapta e pension di behes den caso si e situacion ta duna. Esaki mester wordo adapta a locual e indice di prijs di consumo ta bisa cu a subi. E prijs en general a subi alrededor di 1.3 pa 1.7%, y e aumento lo ta di 2.37%.
Pa SVb tabata necesario pa dal e paso ey. Aunke e ta un suma relativamente chikito, pero pa nos grandinan ta un muestra cu e fondo ta den recuperacion y cu nan lo por cuminsa duna bek na e pensionadonan.
Nan a opta pa bin cu e aumento aki di e pensioen y nan a conseha gobierno pa haci esey tambe. “Nos ta kere cu e señal cu bo mester manda pa e pensionado ta cu e fondo ta riba bon caminda”, el a bisa. Si tur cos ta sigui bon manera cu e ta bayendo actualmente, e halto ehecutivo di SVb ta considera cu den futuro nan lo por keda adapta esey tambe.
Fei di 2009 e pension di behes no a wordo adapta. E ta haya cu mester percura semper pa nos grandinan por keda cu un pensioen cu nan por keda sobrevivi. “Esey ta intencion y nos ta keda vigila y monitor pa cualkier momento cu nos por duna un aumento, nos ta duna un aumento tambe”, el a bisa.
Desaroyo fondo di pensioen
Na 2015, edad di pensioen a cuminsa aumenta mita aña; y ademas a bin e ultimo parti di aumento di e prima di 1%. E medidanan aki a bin cu e meta pa fortifica e fondo pa futuro. Sr. Jacobs a bisa cu na e momento actual e prome 10 luna di aña e prima ta canando un tiki mas ariba di loke nan tabatin proyecta, pero esaki ta un factor positivo encuanto entrada di e fondo.
Di otro banda e gastonan tambe a keda denter di e limitenan of proyeccion cu SVb tin. Apenas 2% bou di locual a wordo proyecta. “Esaki ta trece cun’e un desaroyo positivo pa cu e fondo di pensioen di behes”, el a bisa.
El a laga sa cu e fondo di pensioen di behes (AOV) ta uno hopi importante pa comunidad di Aruba, ya cu nos grandinan ta depende totalmente di e entrada aki. Y pa e motibo ey director di SVb ta considera importante pa fortifica e fondo aki, pero basicamente pa informa nos comunidad con e fondo ta evolucionando, y e ta evolucionando bon, segun sr. Jacobs.
