Despues di su consulta cu Gobernador di Aruba, su Excelencia Alfonso Boekhoudt, lider di partido PPA Otmar Oduber a indica diamars atardi den su declaracion na prensa cu e partido lo tene un partijraad e anochi ey pa vota ken lo representa nan den parlamento.
Manera ta conoci Oduber ta e sospechoso principal den e caso Flamingo. Un caso cu ta bay cumpli cinco aña andando contra e politico. Na mas di un ocasion Oduber a acusa Ministerio Publico (OM) di persecucion politico señalando cu e acusacionnan den su contra ta basa riba informacion falso.
Despues cu recientemente a finalisa cu e tratamento di e caso, hues a indica cu lo duna su sentencia dia 22 di januari 2025. Oduber a enfatisa varios biaha cu e ta kere firmemente den su inocencia cu hues lo dicta un sentencia na su fabor.
Pero ta existi e posibilidad cu hues lo dicta un sentencia cu ta duna Oduber un castigo, cual por bira tambe e castigo cu fiscal di OM a pidi cu ta tres aña di prizon incondicional.
Den caso cu hues dicta un sentencia di castigo pa Oduber, su persona mes a declara durante un debate cu e no lo sinta den Parlamento di Aruba si e keda sentencia.
E noticiero local Noticia Cla a informa cu partijraad di partido PPA, teniendo na cuenta tur e aspectonan alrededor di Oduber, a dicidi di para toch tras di nan lider y sostene Oduber pa e representa e partido den Parlamento di Aruba.
Si dia 22 di januari hues no dicta na fabor di e politico, y si e cumpli cu loke el a declara, segun ley ta indica e asiento lo bay e ora pa e siguiente candidato riba lista cual ta candidato number 2, Eduard Pieters.
