(AP) – Den e senal mas grandi cu Hollywood su plannan di e temporada aki ta pasando den cambionan pa motibo di e coronavirus motiva pa e variante delta, Sony Pictures a anuncia riba diahuebs cu nan lo pospone e lansamento di e segundo pelicula di Venom yama “Venom: Let There Be Carnage.”
Na luga di e apertura den teatronan riba dia 24 di september, e segundo pelicula den e serie “Venom” awo lo lansa dia 15 di october. E pelicula, cu Tom Hardy interpretando e personahe personal, ya a ser posponi varios biaha durante etapanan mas anterior di e pandemia.
Pero despues di varios interupcion y problema pa cu e lansamento, e calendar di peliculanan pa e temporada aki a keda relativamente calma te cu recientemente. Siman pasa, Paramount Pictures a pospone e lansamento di e pelicula “Clifford the Big Red Dog”, citando e variante delta como causa den e situacion aki tambe.
Loke “Venom” y “Clifford” tin en comun ta cu nan tin planea lansamento den teatro so. Sony no tin un plataforma di peliculanan online manera Disney y Warner Bro’s tin. E studionan aki ta conta den mayoria riba e entrada cu e subscripcion di e plataformanan aki ta genera, of e renta digital di e peliculanan aki pa por yuda gana e perdida di e teatronan. E prome pelicula “Venom” a genera un ganashi di 856 miyon dollar globalmente den aña 2018.
Despues di a mira un aumento den benta di carchi di cinemas, e bentanan a bolbe baha bek e simannan reciente. Despues cu disney su “Jungle Cruise” no a duna e bon resultadonan cu a premira den fin di july, Warner Bros. su “The Suicide Squad” tambe a ser considera un fracaso cu un ganashi genera di solamente 26.2 miyon fin di siman pasa. Analistanan a bisa cu e variante delta ta manteniendo varios di e personanan cu tin e custumber di bay cinemas na cas.
Pero e cambio di lansamento di e pelicula “Venom” en particular ta un diferencia grandi, cual ta sugeri cu e industria di peliculanan ta haciendo plan a base di e idea y speransa cu e brote actual y aumento den infeccionnan causa pa e variante delta lo pasa den un tempo relativamente cortico. E fin di siman aki, Disney lo lansa 20th Century Fox su produccion “Free Guy”, cu Ryan Reynolds solamente den teatronan, diferente na e otro lansamentonan cu e compania tabatin anteriormente, cual ta tumando luga ambos den teatro y riba di e plataforma di subscripcion y renta di peliculanan online.
