(AP) – E pelea di Mike Tyson contra Jake Paul a keda posponi despues cu Tyson, 57, a bira malo durante un vuelo weekend ultimo.
Tyson y Paul a bisa diabierna cu nan ta bay anuncia un fecha nobo pa e pelea proximo siman. Nan tabata programa pa reuni dia 20 di juli na Arlington, Texas.
Tyson a bira malo durante un vuelo for di Miami pa Los Angeles diadomingo ultimo, y personal di emergencia a bin topa e avion. Representantenan di Tyson a atribui e episodio na un problema cu ulcera.
“Durante un consulta di siguimento diahuebs cu profesionalnan medico riba su problema recien cu ulcera, e recomendacion ta pa Mike Tyson haci training minimo te leve durante proximo simannan y despues bolbe na training completo sin limitacion,” e promotornan di e pelea a bisa den un declaracion.
Tyson no a bringa profesionalmente desde juni 2005, pero e tabata training regularmente pa varios aña. El a bringa Roy Jones Jr. den un exhibicion di entretenimento na november 2020.
“Mi curpa ta den miho condicion general cu loke e tabata desde añanan 1990, y mi ta bay ta back na mi schedule di training completo pronto,” Tyson a bisa den e declaracion. “Jake Paul, esaki por a gana bo un tiki tempo, pero na final bo ta bay ta knock out y fuera di boxeo permanentemente. Mi ta aprecia tur hende nan pasenshi y no por warda pa duna un prestacion inolvidable despues e aña aki.”
Ticketnan cu ya a wordo cumpra pa e pelea na e stadion sede di Dallas Cowboys ta bay ta honra riba e fecha nobo di e pelea, e promotornan a bisa.
Paul, 27, ta un strea di YouTube kende a crea un carera exitoso di pelea en gran parti door di enfrenta artistanan marcial mixto y boxdonan.
“Mi ta sostene e posponemento di e evento completamente pa asina Mike Tyson no tin excuus riba nochi di e pelea,” Paul a bisa. “Mi fanaticonan sa cu mi no kier enfrenta Iron Mike na nada menos cu su best, pues no kiboca: Ora e subi e ring cu mi, mi ta bay ta cla pa reclama mi W (victoria) cu un final sensacional.”
