Bringamento di gay gayero na Aruba ta oficialmente contra ley. Articulo 477 y 477 inciso 1 di Codigo Penal ta prohibi y castiga pelea di gay. Pero manera tabata e caso bao maneho di Gabinete Mike Eman, y e Gobiernonan prome cu esey, e actual Gabinete tambe ta tolera e wega di placa aki cu ta afecta bienestar di animal. Es mas, articulo 476 di Codigo Penal ta papia di castigo pa permiti sufrimento di un animal cu ta bao responsabilidad di un individuo.
Pero pa polis, para y penalisa pelea di gay no ta un prioridad.
E tema a hala atencion ayera despues cu riba rednan social, particularmente Facebook, a extende invitacion pa peleanan di gay. Esnan cu ta organisa no ta sconde nan nomber ni e evento, y mas bien ta promove nan publicamente.
Motibo ta cu no tin consecuencia, pasobra ya na 2014 caba, e tempo ey Minister di Husticia mr. Arthur Dowers a bisa cu pelea di gay no ta un prioridad pa polis. Durante un entrevista cu Caribisch Netwerk na 2014, Alto Inspector Trudy Hassell a hasta lamenta cu miembronan di Cuerpo Policial di Aruba ta participa na peleanan di gay, cu e tabata considera “maltrato di animal.” E tempo ey, Minister Dowers a bisa cu Sra. Hassell mester presenta prueba.
Pero e invitacionnan pa e actividadnan di pelea di gay a yama atencion atrobe y un biaha mas Bon Dia Aruba a acerca Cuerpo Policial cu e pregunta si ta actua contra e actividad ilicito aki. E contesta cu a ricibi ta cu e ta keda na discrecion di cada agente policial. Ministerio Publico di su banda a bisa cu e ta un asunto di Polis.
Minister di Naturalesa y Medio ambiente, Ursell Arends, kende por cierto ta tene sesionnan informativo riba e asina gedoogbeleid riba piscamento cu harpun, cu formalmente tambe ta prohibi segun ley, a bisa di a tuma nota di e invitacionnan. “Mi team legal ta tirando bista riba e aspecto legal y con pa atende cu e asunto,” Minister Arends a bisa.
Mester bisa cu for di 2007 caba cu SER a produci un rapport pa expresa preocupacion pa e actividad di wega di placa na Aruba, cu ta afecta e bienestar di hopi famia. Y entre e preocupacionnan di SER, tabata e peleanan di gay cu tambe ta wega di placa. E tempo ey SER tambe a bisa cu Servicio Veterinario a señala su preocupacion pa e cantidad di peleanan di cacho cu ta tumando luga na Aruba, tambe como wega di placa.
Pa loke ta e Codigo Penal, e ta castigabel pa organisa pelea di gay y den un siguiente articulo ta bisa cu ta prohibi pa organisa pelea di gay pa publico. E castigo ta di dos siman di prison y un boet di 50 florin. Di otro banda, e castigo pa abuso di animal ta describi den otro articulo den Codigo Penal y pa esaki tin un castigo di maximo un luna di prison y 600 florin di boet.
