Pedro Wilson, boluntario pa asistencia di adiccion na Aruba, tabata traha cu gobierno pa 17 aña yudando na yega na e adicto nan na Aruba pa manda nan afo pa rehabilitacion incluyendo Marlon den pasado. sr.Wilson ta conta Bon Dia cu ningun hende a preocupa cu Marlon tempo cu e tabata riba caya pa awo haci manera nan semper tabata worry cun’e.
”Marlon tabata tin hopi aña riba caya, nunca mi a tende cu e la coy mesun hopi fama cu awo. Famia ta preocupa, esaki ta preocupa, e otro ta keha, anto con a para ora Marlon tabata riba caya? Ningun hende tabata preocupa ora cu e tabata drumi riba caya y awo cu e ta hayando chens pa recupera, no kier duna e homber un chens pa e rehabilita!” sr. Wilson ta splica Bon Dia
Sr. Wilson ta lantando su fundacion y e ta bisa Bon Dia cu e no kier hinca su mes memey di un guera cu Marlon su recuperacion. ”Tin un grupo cu a lanta anto nan kier a haci algo anto nan a scoge Marlon, ningun hende a acerca ningun hende pa puntra bo sa, sikiera un conseho. Nan a logra hiba Marlon afo, e la yega Hulanda, bueno. Despues mi ta tende noticia cu Marlon a scapa y e ta comportando su mes malo y despues mi ta tende cu nan a saca Marlon for di e luga cu e tabata kedando na Hulanda” , sr. Wilson ta splica.
Yudando Marlon rehabilita no ta un tarea facil
sr. Wilson ta splica Bon Dia cu e conoce Marlon for di hopi aña caba. ”Van Der Straten, a topa Marlon na pomp di gasolin San Nicolas anto e la tuma un cariño pa e guy anto e la pidi nos pa regla tur e papel nan pa Marlon bay bao di curatela den 2007. Marlonchi su papel nan ta na Ministerio Publico for di basta tempo. Pa mi, Marlon mester di un luga special, un luga cera, e no por bay den un luga habri pasobra e no ta un persona facil pa rehabilita”, sr. Wilson ta bisa.
Marlon no a keda riba caya
Segun sr. Wilson, despues cu e la tende di e problema cu Marlon a haya cu e mester a sali for di e iglesia, e la busca contact cu e tin anto a haya luga pa Marlon keda un rato te ora cu e contact nan di e otro centro di rehabilitacion wordo confirma. ”Mas importante pa mi ta Marlon su siguridad y recuperacion, mi no ta worry tur e papiamento ey di placa. Mi no ta papiando contra ningun hende pero, bo no por bisa mi cu bo ta bay yuda un adicto na Aruba pa bay afo y despues no sa unda e ta” , sr. Wilson ta splica Bon Dia. sr. Wilson ta agrega cu e la yuda busca un centro na Rotterdam caminda Marlon ta bay keda pa sigui cu su recuperacion.
”Si Marlon kier tuma contacto cu cualkier persona, e lo haya contacto cu nan.
Esaki ta pa gobierno na Aruba lanta for di soño
sr. Wilson ta splica Bon Dia cu esaki ta algo cu mester cuminsa lanta gobierno for di soño na Aruba pa cuminsa haci mas pa yuda combati e problema di adiccion.
”E ta un berguensa cu e cosnan aki mester pasa. Nos tin centro akinan y manera pa yuda adicto nan na Aruba pero nada no ta wordo haci. Cu un grupo mester lanta pa manda un persona afo , anto e ora e cosnan aki ta pasa. Marlon ta su so! Marlon ta un mayor di edad berdad, pero den su mente e ta un mucha chikito aworaki. Droga a cuminsa sali for di su curpa anto e ta hopi spanta sin haya niun yudansa drechi.” Sr. Wilson ta splica.
