E posibel partnernan di gobierno di Aruba pa e reapertura di e refineria tin nan man yen cu otro problema urgente. PDVSA ta enfrentando problema grandi tecnico tanto den refineria como den su puerto mas importante di exportacion di crudo, causa pa falta di mantenemento di ekipo. Esaki na su turno ta producto di escasez di capital pa mantene su instalacionnan na orden. Na su turno e falta di capital a ser causa pa e fondonan cu estado Venezolano ta sacando for di e compania pa uza pa otro meta, manera su programa di importacion di producto basico, ya cu e pais su produccion interno a collapse. Exportacion di crudo y producto petrolero ta representa mas di 95% di exportacion total.
Actualmente PDVSA ta hayando problema den su refinerianan na Punta Cardón y Amuay, unda tin varios unidad di refinamento fuera di operacion. A bin acerca den e ultimo simannan problema den su puerto principal di exportacion di crudo na Jose, estado Anzoátegui, unda solamente cuatro di e 11 tubo di carga/descarga ta funcionando. E problemanan a ocasiona un aglomeracion grandi di tanker cu ta warda pa tuma carga. Di otro banda, Jose ta sirbi tambe como puerto di entrada pa crudo y otro producto petrolero manera nafta cu Venezuela ta importando pa mescla cu e crudo ultra pisa di Orinoco. Sin e importacion aki tin stancamento den mehoracion di e crudo di Orinoco, loke awor caba ta e parti mayor di exportacion di crudo. E problemanan cu carga/descarga na Jose ta parce igual na esun causa na fin di 2015, tempo cu PDVSA no por a cumpli cu varios pago adelanta di crudo y producto petrolero importa, impediendo nan entrada. Parti di e crudo destina pa drenta Venezuela a ser desvia pa St. Eustatius y Curaçao unda PDVSA ta huur capacidad di almacenahe.
Mientras PDVSA tabata cumpra crudo for di diferente pais, entre otro Algeria, Nigeria y Rusia, awor cu a habri e posibilidad di cumpra crudo liviano Mericano (WTI: West Texas Intermediate) despues cu a termina e prohibicion di exportacion di crudo produci na Merca, a cuminsa e aña aki cu importacion di crudo di Merca. Citgo, subsidiario di PDVSA na Merca, a inicia cu algun cargamento di crudo cu a bay pa refineria Isla na Curaçao, cu PDVSA ta lease di e compania estatal propietario di e refineria aki. Tambe PDVSA ta cumprando crudo Mericano for di PetroChina, segun informacion di agencia Reuters.
E problemanan describi ta ocasiona cu e situacion financiero di PDVSA no ta mehorando, aumentando su dependencia riba loke Citgo por aporta na e empresa madre den forma di dividendo. Mientras tanto, ambos empresa ta pasando den un mal momento pa loke ta publicidad, despues cu tres funcionario di PDVSA a declara culpabel di acepta soborno den diferente forma di Roberto Rincón y su amigo Abraham Shiera, pa otorga na companianan di e dos personanan aki contract luhoso na prijs exagera pa entrega di material y ekipo na e empresa estatal Venezolano. Abraham Shiera tambe a declara culpabel diamars 22 di maart, lagando como unico persona den e caso grandi di soborno y labamento di placa cu mester enfrenta hues ainda José Roberto Rincón mes, cu te na e momento aki ta mantene su posicion di inocencia. Cu tur e otro protagonistanan den e caso aki admitiendo culpabilidad, e asunto ta mustra bastante scur pa Rincón, cu lo ta den corte dia 25 di april proximo.
Cu e situacion tenso aki pa e companianan envolvi den negociacion cu gobierno di Aruba tocante reapertura di e refineria na Aruba, ta comprendibel cu lo no ta facil pa drenta un convenio cu consecuencia financiero grandi, mientras cu e atencion lo mester bay na e problemanan cu tin pa mantene e operacionnan actual bao control, cu ta e ‘life line’ di e pais.
Fuera di esey, PDVSA, y gobierno di Venezuela, ta enfrentando un reto grandi mas laat den e aña aki, ora cu e compania estatal mester cumpli, of refinancia un total di $ 5000 miyon na prestamo den bono. Tambe tin rapport cu ta referi na e dificultad creciente pa PDVSA saca mas recurso for di Citgo na e momento aki, mirando e situacion crea caba pa e pakete di $2.8 Biyon di debe den bono cu a crea aña pasa. E maniobra aki a lanta preocupacion severo pa loke ta Citgo su profiel di credito, ligando esey na e status di credito di PDVSA, dificultando posibel fiamento pa ambos den futuro. Esaki ta tira un luz scur riba posibel prestamo pa rehabilita e refineria na Aruba, ya cu loke PDVSA por obtene actualmente, ta bay pa cubri necesidad den importacion di crudo liviano y producto petrolero cu no por produci den e pais mes.
E situacion aki ta lanta e pregunta si esaki ta e momento propicio pa yega na un deal pa cu e refineria di Valero, mientras na otro banda di e mesa tin dos compania cu ta entre esnan mas cuestiona den e ambito financiero internacional.
