(CuraçaoChronicle) – Refineria di Corsou (RdK) a yega na un acuerdo cu Pdvsa pa resolve debenan laga atras pa Refineria Isla BV despues cu a stop operacion na 2019. E resolucion di debe ta bay tuma lugar door di suministro di producto petrolero na lugar di pago cash.

Despues cu Refineria Isla BV a stop su operacionnan, a keda cu debe tanto na Corsou como Bonaire, unda e compania petrolero tabata maneha facilidad BOPEC. Riba Corsou, cierto producto di Refineria Isla BV a ser bendi pa cubri parti di e debe habri. RdK tambe a recupera algun salario di empleadonan.
Sinembargo, un suma pendiente di mas di 100 miyon dollar ta keda sin pago, igual cu un debe den forma di salario di empleado y servicio duna na Bonaire. Gobierno di tanto Corsou como Hulanda a inicia negociacion pa sigura pago pa e debenan habri aki despues cu Merca a elimina algun sancion contra Venezuela.

Pdvsa awo a bay di acuerdo pa resolve e suma restante den forma di produco petrolero. E acuerdo aki ta parti di un marco mas amplio cu ta inclui negociacionnan den futuro pa reanudacion di relacion entre Venezuela, Corsou y Bonaire. Inicialmente, esaki ta involucra utilisacion di capacidadnan di almacenahe na Bullenbaai y BOPEC, como tambe e posibilidad di procesa crudo Venezolano na Corsou.

Rol di Qatar

Reportahenan internacional na november a resalta e rol significante di Qatar den negociacionnan la elimina sancionnan Mericano contra Venezuela. E decision pa elimina e sancionnan a tuma lugar dia 17 di october ultimo.

Tiki despues, riba dia 22 di october, RdK a anuncia cu a firma un MoU cu Oryx Petroleum Limited pa haya un partner adecuado pa maneha y opera e refineria y Bullenbaai. Oryx Petroleum Group ta un compania priva incorpora na Hong Kong pero propiedad di Ghannim Bin Saad & Sons Group for di Doha, capital di Qatar.

Maunsell Investment Management di Vancouver, Canada, ta coordinando e due diligence di Refineria Isla y facilidadnan di Bullenbaai. Ta spera cu ta bay alcansa un acuerdo definitivo cu Corsou na 2024. Maunsell a drenta den un acuerdo cu e compania local Alternative Energy Facility BV pa asistencia cu e due diligence.

Global Oil Management Group basa na Merca ya ta trahando pa upgrade cierto facilidadnan di refineria pa produci asfalt pa mercado Mericano. Ta anticipa cu Global Oil ta bay cuminsa usa crudo Venezolano pa produccion di asfalt na mei di 2024, maske tin informacion contradictorio indicando actividad limita riba tereno di Refineria Isla.

Oryx tambe tin plan pa inverti den un planta di gas LNG pa opera e refineria cu menos contaminacion. E eliminacion di sancion for di Merca lo mester habilita importacion di gas for di Venezuela.