Diabierna ultimo a bira conoci cu e compania estatal petrolero Venezolano PDVSA a habri un oferta na tenedonan di bono di e compania, pa cambia nan bononan cu ta madura na 2017, pa bono cu maduracion na 2020. Ta trata di un operacion cu ta propone posterga pago di 7100 miyon dollar na bono, den un intento cla pa evita un posibel default otro aña. Entre e aña aki y 2017 e compania ta enfrenta pago di en total como 8000 miyon dollar na debe cu ta madura. Den e oferta ta mantene e mesun porcentahe di 8,5% di interes durante e periodo extra cu PDVSA pa e bononan cu ta madura na november 2017. E bononan cu ta caduca na april 2017 tin actualmente un interes di 5,25% y ta duna un imagen mas atractivo cobrando e interes mas halto ofreci.
E resultado inmediato riba dialuna dia 19 di september tabata un caida considerabel di e bononan di PDVSA riba mercado. Prijs pa PDVSA su bono di april 2017 a cay 3% te 71.5 cen di dollar, y esun di november 2017 a cay cu 1.6% te 77.5 cen. Den reaccion riba diferente medio financiero internacional ta resulta duda si bao di e condicionnan actual lo tin tanto interes di e tenedonan di bono. Gran parti di e duda tin di haci cu e situacion cu e compania ta aden. Diferente factor ta hunga un papel, manera prijs abao riba mercado internacional pa crudo, problema cu pago di contratista internacional cu ta clave den mantenemento di e facilidadnan di produccion, caida den produccion di crudo den e aña aki, pago excesivo na dividendo y subsidio di un cantidad grandi di asunto pa estado Venezolano cu ta afecta rentabilidad di e empresa.
Pospone pago di e suma inverti pa hopi inversionista ta un riesgo grandi, ya cu no ta conoci den ki situacion e compania por ta na 2020. Sin un bonus adicional den forma di un interes mas halto lo no tin tanto animo pa haci e cambio, cu ta vigente te dia 29 di september proximo. E documento cu ta contene e oferta ta bisa cu e compania por dicidi di prolonga e periodo cu e oferta ta valido.
E compania tin pendiente pa paga un 2,3 biyon dollar na amortisacion riba bono cu ta madura otro aña, cu ta mas cu 50% di loke e compania mester paga e aña aki ainda na debe, entre october y november. PDVSA no ta preocupa pa ‘swap’ su bononan cu ta caduca na october proximo mes, pero mas bien ta concentrando riba e pagonan di otro aña cu e ta considera un riesgo mas grandi.
Analista na agencia Nomura Holding Inc., Siobhan Morden, a declara cu e incertidumbre tocante con e collateral di CITGO lo keda balora, ta causa parcialmente e desapunto inicial den e mercado di bono pa cu e propuesta di ‘swap’, segun informe di Reuters. “Nos ta considera e ‘swap deal’ di debe aki no atractivo”, Victor Fu, un analista specialisa den mercado emergente na Steifel Nicolaus & Co. a bisa den un nota pa cliente, segun Morningstar Advisor.
Segun agencia Reuters ta informa, PDVSA lo a habri negociacion cu CreditSuisse pa logra haya nan colaboracion den e operacion aki. Otro incentivo cu PDVSA a introduci ta cu lo uza accion den CITGO como ‘collateral’ den e oferta aki. Esey sin embargo no ta sin complicacion, ya cu CITGO Petroleum Corporation y su propietario inmediato, Citgo Holding LLC, tin compromisonan financiero grandi cu debenan adkiri caba. Pa CITGO obtene e prestamonan grandi na inicio di 2015 di 2,8 biyon dollar di cual 2,2 biyon a paga na PDVSA como dividendo, a bay di acuerdo cu condicion special cu ta duna e acreedornan di e tempo ey derecho di adkiri accion te cu 50, 01% di e total, cediendo asina e control riba e compania refinador cu ta produci pa e holding nan y PDVSA haya via dividendo. Den e documento oficial y confidencial di oferta cu PDVSA a presenta na e tenedonan di bono, y cu a aparece riba internet, e compania ta hay’e obliga di admiti cu den caso di un default, e acreedornan existente di CITGO tin preferencia den haya accionnan di CITGO, cu e posibilidad cu PDVSA, via su holding nan, lo no ta accionista mayoritario mas.
Tambe e documento ta revela varios caso di demanda contra PDVSA di banda di diferente contratista grandi cu tin miedo cu e pago anticipa di dividendo menciona lo a afecta posibel cumplimento di e compania cu debe cu e tin cu e contratistanan y otro acreedor. Entre nan ta figura CRISTALLEX, $1600 miyon; EXXONMOBIL, $1600 miyon; RUSORO, $1200 miyon; OWEN ILLINOIS, $485 miyon, entre otro. Si e intento aki di PDVSA pa posterga pago grandi di debe te 2020 no resulta, e peligro di un posibel default ta surgi atrobe.
