(EFE/lapatilla.com) – E empresa estatal Venezolano Petroleos de Venezuela (Pdvsa) a firma diasabra pasa acuerdonan den materia energetico y di gas cu e empresa petrolero Ruso Rosneft, asina gobierno di presidente Nicolás Maduro a informa.
Den un serie di mensahe publica riba Twitter, Pdvsa a indica cu e presidente di Rosneft, Igor Sechin, a seya acuerdo cu e ministro di Petroleo y hefe di e compania petrolero Venezolano, Manuel Quevedo, den presencia di e hefe di estado di e pais.
Aunke e ministronan ni e presidente Venezolano a ofrece declaracion, e canal estatal VTV a mustra imagennan di e reunion cu Sechin, Quevedo, Maduro y otro autoridadnan a tene.
Segun e agencia estatal AVN, e acuerdonan firma diasabra ta relaciona “cu bono entre Rosneft y Pdvsa, cu tambe ta socio den cinco empresa mixto: Petromonagas, S.A., Petromiranda, .S.A, Boquerón, S.A., Petroperijá S.A., y Petrovictoria.”
Despues e empresa Ruso a expresa den un comunicado cu Venezuela a asigna licencia na un unidad di Rosneft pa desaroya dos campo di gas riba lama.
Bao di e acuerdo, valido pa 30 aña, Grupo Rosneft subsidiario di e empresa petrolero- lo opera e camponan di gas di Patao y Mejillones, y e empresa Ruso lo tin derecho di exporta henter e produccion.
E gobierno socialista di Venezuela a bira cada biaha mas den direccion di su aliado Rusia en busca di placa y credito. Pdvsa tin un debe di 6.000 miyon dollar cu Rosneft, di acuerdo cu e calculacion di e empresa Ruso na luna di augustus.
Luna pasa Venezuela a acorda un restructuracion di su debe cu gobierno Ruso, pero e compromiso no ta inclui e debe di Pdvsa cu Rosneft.
