E compania estatal di petroleo di Venezuela PDVSA, ta buscando forma pa emiti te cu 4,7 biyon dollar na documento di valor, den forma di ‘promissory notes’ (pagaré na Spaño) pa cumpli cu e companianan cu ta haci trabao tecnico como contratista pa PDVSA. Ta trata di tanto compania internacional como compania Venezolano.
E noticia ta procedente di agencia Reuters, cu ta bisa cu nan a mira un documento cu ta duna prueba di esaki. E propuesta ta indica cu e compania ta recuri na metodo financiero compleho y menos comun, pa purba sali di su problemanan financiero, producto entre otro di prijs abao pa crudo riba mercado mundial. Tambe e ta mustra cu su situacion grave ta haci mas dificil pa recuri na maneranan mas tradicional y economico pa haya financiamento.
Luna pasa PDVSA a emiti un oferta di cambio di bono cu ta madura na 2017, pa bono cu ta madura na 2020. Esaki den un esfuerso pa evita un default riba pago di sumanan grandi den e luna aki y na november, y na 2017 tambe. E poco interes pa acepta esaki, a haci cu PDVSA a baha e suma inicial di $7,1 biyon pa $5,3 biyon, pa aumenta e probabilidad cu tin suficiente tenedo di bono cu lo bay di acuerdo cu e oferta. E emision silencioso di e promissory notes, cual segun fuentenan ta data di luna di juni di e aña aki, por afecta e confiansa di inversionista den e intento cu PDVSA ta haciendo pa haya suficiente interes pa inscribi riba su cambio di bono pa 2020.
Un Powerpoint presentation di PDVSA di juni cu no a ser publica anteriormente, ta bisa cu e compania ta propone pa emiti e pagarénan na 63 compania cu cual nan tin debe. Na september PDVSA a bisa caba cu el a saca S1.15 biyon na promissory notes e aña aki na compania di servicio manera Halliburton y Weatherford y companianan local menos conoci. No tabata inmediatamente evidente si e emission menciona tabata forma parti di e pakete di $ 4,7 biyon, o cu e volumen di e pakete a cambia desde cu a propone esaki na juni. PDVSA y Weatherford no a responde inmediatamente na peticion pa comentario di Reuters. Halliburton a nenga di comenta.
E operacion ta permiti companianan cu ta duna servicio pa ricibi promissory notes, cual ta similar na bono pero mas dificil pa bende, a cambio di factura no paga pa servicio duna luna, hasta varios aña pasa. Mayoria di e companianan, particularmente esunnan local, ta dispuesto pa ricibi e nan como pago, segun un fuente envolvi. E por yuda compania cu a slow down o hasta para trabao pa motibo di falta di pago, pa reanuda trabao manera riba cobamento di pos. Esaki por yuda PDVSA aumenta produccion di crudo, cu a cay tur luna di e aña aki, yegando na un dramatico caida di 10,2% na augustus, segun e informenan di e pais na OPEC.
PDVSA lo regla debe grandi a traves di negociacion individual cu proveedornan, y lo a contacta 44 compania local di servicio cu un oferta pa hinca debe menor den un pool pa un solo emision di $2,5 biyon, segun un fuente cu conocemento directo di e operacion, a bisa siman pasa.
E papelnan lo tin maduracion den tres aña y un periodo di gracia di un aña, segun e fuente, añadiendo cu un banco Europeo no identifica lo coordina e emision. Nan lo haci e emision den e simannan venidero. E promissory notenan emiti te awor lo aumenta PDVSA su pago anual riba debe cu $400 miyon, cuminsando na 2018, segun calculacion di Reuters, mientras cu completando henter e pakete por aumenta esaki te na $1.6 biyon.
Segun calculacion na Wall Street e cambio proponi di bono por yuda PDVSA economisa como $3,5 biyon den e proximo diescinco luna, considerablemente menos di loke ta propone pa emiti awor na promissory notes.
