7pdvsa (LM).jpg

Den un articulo reciente e corant Venezolano El Universal a anuncia cu e banco principal cu ta haci transaccion financiero pa e compania estatal PDVSA a dicidi di no duna servicio bancario mas na e empresa aki.

 

E banco en cuestion ta Citibank, cu segun e instituto di estudio internacional Stratford, cu su decision di no paga mas, a trece un posibel default di PDVSA hopi mas cerca. “Perde e principal encargado di pago di e debe lo hiba PDVSA na un default,” segun e corant ta cita Stratford. Mas aleu Stratford ta bisa cu un paro den pago di debe lo desencadena un cascada di evento cu por desestabilisa e pais ainda mas.

 

Stratford ta indica cu aunke e nacion a biba cu e fantasma di un default pa varios aña, gobierno semper a mustra su boluntad pa cumpli cu su compromisonan cu inversionista. Esaki tabata posibel hasta ora esaki a implica corta den importacion, pa sigura cu e recursonan tabata disponibel pa continua honrando e pago di su obligacionnan.

Citibank a comunica na PDVSA su decision di renuncia na sigui desempeña como principal agente di pago di interes riba e bononan emiti. E medida ta afecta por lo menos nuebe di e papelnan emiti. No obstante, Citibank tin e responsabilidad di continua haciendo e pagonan te ora PDVSA contrata otro entidad financiero.

 

Loke ta inconveniente pa e empresa ta cu tabata bastante complica caba pa haya un banco internacional pa presta tur e servicionan necesario pa cumpli cu e responsabilidad aki. Ademas na e momento aki ta tramitando un negociacion encuanto intercambio di bono, y e hecho cu no por conta cu un agente pagado, ta dificulta operacion.

Tambe Stratford ta splica cu e eventonan mas reciente – manera e protestanan di oposicion di siman pasa – a aumenta e posibilidad cu Venezuela por decreta un paro den e pago di debe externo, “desencadenando asina un cascada di evento cu por destabilisa e pais ainda mas.”

 

Stratford ta sostene cu e hecho cu e empresa petrolero por cay den default, ta habri porta pa mas caos politico y economico. “E imposibilidad di paga e tenedonan di bono por conduci eventualmente na un proceso di restructuracion di e debe, pero PDVSA cu ta basa su mes ariba credito pa cubri gasto operativo, probablemente lo sufri un perdida di produccion, anto e prestamistanan por ta menos dispuesto ainda pa extende e linea di credito na un empresa den bancarota.”

Ta p’esey e firma (Stratford) ta señala cu si tin un caida mas fuerte di produccion “esaki por aumenta e instabilidad di e pais. E fluhonan di divisa pa financia publico, cu ta crucial pa paga importacion di alimento y otro bienes necesario, lo keda reduci y lo intensifica e inflacion extremo y lo crea mas descontento social”.

 

Segun opinion di Stratford, gobierno Venezolano a depende na prome luga di e forsanan di siguridad pa contene e disturbionan genera. “Pero e problemanan di debe a bira critico, pa gran parti debi na e presion di gobierno di Estadonan Uni riba e banconan grandi pa nan mantene un distancia di e fluhonan financiero ilicito di Venezuela”.

Den e articulo El Universal ta menciona tambe un informa di e firma Caracas Capital Market cu ta indica cu produccion di crudo di PDVSA, pa bende riba mercado internacional, ta di 900.000 bari pa dia. Nan ta agrega cu e cifra aki ta obteni despues di desconta e consumo interno y e mandamento di crudo pa China, pa paga e prestamonan cu tin cu e pais aki.

 

Fuente: El Universal, 5 september 2016.

 

Nota di redaccion: Den e aña aki, produccion di crudo total a cay na un nivel di apenas 2 miyon bari pa dia, cu menos di mita di esaki disponibel pa benta riba mercado internacional.