E empresa petrolero estatal Venezolano PDVSA a inicia diabierna e pago di 841,88 miyon dollar di un bono cu vencimento na 2020, y a para pa e momento e riesgo di un default, asina e empresa a anuncia ayera.
“PDVSA ta informa cu ya a inicia e transferencianan bancario corespondiente na e pago principal di e Bono PDVSA 2020, pa un suma total di US$ 841,88 myon pa e cuentanan di banco J.P. Morgan,” e empresa petrolero a anuncia den un comunicado.
E pago ta coresponde na e suma principal di e cupon di 8,5%, di cual e capital no tabatin periodo di gracia, e diferencia cu e interesnan cu ta alcansa US$143,1 miyon.
PDVSA a destaca cu e pago “ta demostra un biaha mas su capacidad operacional y financiero solido,” aludiendo na e temor di e mercado di un default.
E pago aki “ta desmenti e voznan di mal profeta cu ta pusta placa riba e deterioro economico di e pais y ta ataca pueblo Venezolano,” e compania a agrega, cu diahuebs venidero lo mester paga US$ 1.169,1 miyon di un bono cu ta vence e dia ey, 2 di november.
PDVSA a remarca cu su “solvencia pleno” a keda confirma a pesar di e “guera econmico”, di e sancionnan di e presidente Mericano, Donald Trump, y di e “sabotahe, persecucion y blokeo financiero” na cual, segun e ta sigura, a somete e pais.
