(lapatilla.com/Reuters) – E empresa petrolero Venezolano PDVSA por perde su licencia pa opera un terminal di almacenamento di petroleo na Bonaire, si e no cumpli pronto cu exigencia di mantenemento di e reguladornan, segun un vocero di gobierno Hulandes a comunica na  agencia Reuters.

E terminal Bonaire Petroleum Company -BOPEC- , cu un capacidad di almacenamento di 10 miyon bari y pier di awa hundo cu ta permiti cargamento di embarcacion grandi, ta un parti clave di e logistica di PDVSA den Caribe y por perhudica tur articulo cu ta wordo manda pa Asia, hustamente na momento cu e pais miembro di OPEC mester aumenta su entradanan di exportacion.

“Nos a duna nan un ultimatum pa presenta un plan solido pa garantisa operacion) mas sigur” pa 5 di januari, Danielle Rebel, vocero di Ministerio di Infrastructura y Medio Ambiente na Hulanda, ta bisa.

BOPEC tin retraso den medida necesario pa alcansa standardnan internacional, el a splica. Si nan no cumpli cu e plan solicita pa inspeccion di Medio Ambiente y Transporte (ILT) di Bonaire, nan mester cuminsa haci e terminal bashi pa inicio di februari y suspende nan operacion, e funcionario a bisa. Finalmente, por pasa pa revoca e licencia, el a añadi. Pdvsa no a responde riba solicitud pa comentario di Reuters.

Reclamo desatendi
E desacuerdo entre Bonaire y PDVSA a cuminsa un aña pasa tempo cu e gobierno a exigi un plan di remediacion pa e terminal, incluyendo mehoracion di e tankinan, tuberia, piernan y ekipo electrico, den un acumulacion di responsabilidad ambiental, segun dos fuente cerca di Pdvsa.

Despues di un inspeccion na april, e compania a acorda un plan di inversion di US$ 25 miyon cu un prome Quota di US$ 5 miyon cu nan no a paga. Pdvsa a solicita un parti di e placa na su unidad di refinacion Isla na Curaçao, pero no a ricibi esaki, un di e fuentenan a agrega.


Na juli, e vice-presidente di Comercio y Insumo di Pdvsa, Ysmel Serrano, tambe a bishita BOPEC, adkiri pa e compania na 1989, cu un ekipo cu a inspecciona e terminal maritimo y a traha un lista di tarea necesario pa cumpli cu e standardnan di calidad y confiabilidad, asina e empresa a bisa e tempo ey den un comunicado di prensa.

Den e lunanan siguiente, gobierno di Bonaire tabata cerando tanki na BOPEC cu ya no tabata sigur pa opera. Na fin di november, solamente 5 di e 21 tankinan tabata den operacion, loke tabata dificulta Pdvsa pa manda fuel oil di e terminal, segun e fuentenan.

“Pdvsa no a inverti den e instalacionnan aki durante varios aña, motibo pa cual e logistica pa mescla e combustibel a bira un desastre. Nan ta bendiendo e combustibel likido directamente di e posnan na e refineria di Amuay“, un di e fuentenan a bisa.

E empresa estatal Pdvsa normalmente ta manda petroleo combustibel produci na Venezuela y Curaçao pa Bonaire, unda por mescla na e temperatura adecua y carga esaki den embarcacion grandi. Su principal cliente ta PetroChina Co.

E ciere di tanki na Bonaire y e operacion hopi abao di e refinerianan di Amuay y Cardón di Pdvsa na Venezuela a contribui na e problemanan den e mandamento di combustibel pa barco, un id e principal productonan di exportacion di Venezuela.