E empresa estatal Petróleos de Venezuela (Pdvsa) a declara den fin di siman cu a pasa, cu e infame blokeo cu Merca a impone contra su pais, no lo afecta e aliansa cu gobierno di Nicolás Maduro ta mantene cu esun di presidente Chines, Xi Jinping, segun agencia noticiero EFE.
“E infame blokeo cu e imperio di Estadonan Uni ta impone traves di gobierno di Donald Trump, contra nos pais, no lo afecta e Aliansa Strategico Integral, seya pa e presidentenan di China, Xi Jinping y di Venezuela, Nicolás Maduro Moros,” Pdvsa a bisa den un comunicado.
E texto di e empresa petrolero Venezolano a wordo difundi cu e obhetivo di desmenti e noticianan cu a keda publica cu e intencion di perhudica imagen di gobierno di Republica Bolivariano di Venezuela” encuanto e relacionnan strategico, comercial y industrial,” cu ta mantene cu China.
Den e sentido ey, a señala cu ambos pais ta conta cu un relacion estrecho di cooperacion directo traves di nan empresanan petrolero matriz, Petroleos de Venezuela, S.A. (Pdvsa) y China National Petroleum Corporation (CNPC), cu inversion conhunto den orden di 10.000 miyon dollar.
Tambe nan ta sostene relacion cu cuatro empresa mixto cu ta desaroya proyecto di produccion den e reservanan di crudo cu Venezuela tin y cu ta yega te cerca di 800.000 bari pa dia di petroleo. Pdvsa ta señala ademas cu e ta mantene un suministro di crudo cu CNPC pa te 760.000 bari pa dia.
E empresa estatal petrolero Venezolano ta recorda cu hunto cu CNPC e ta construyendo e Refineria di Nanhai, den provincia di Guangdong, China, cu un capacidad di procesamento di 400.000 bari pa dia, di cual te 280.000 bari pa dia ta procedente di e proyectonan conhunto di produccion” den e pais Caribense.
Dia 25 di augustus ultimo, presidente di Merca, Donald Trump, a firma un orden ehecutivo den cual el a impone sancion Venezuela nan financiero nobo pa Venezuela y cu ta afecta Pdvsa tambe.
E medida ta prohibi negociacion di debe nobo y di capital emiti pa gobierno di Venezuela y su compania petrolero estatal.
Tambe ta prohibi e negociacionnan cu cierto bononan existente di sector publico Venezolano, como tambe pago di dividendo na gobierno di Venezuela.
