Segun politico Andin Bikker, desde janauri 2016 sr. Alonso Tromp tabata e prome pa haci e asercamento pa sondea un union di forsa entre sr. Otmar Oduber y su persona. Na november 2016 el a bolbe acerca y a reuni varios biaha cu conseheronan di Otmar Oduber. Varios ruenion a tuma luga na su cas y e texto di e protocol E Forsa Nobo a wordo trata y conclui na su cas den presencia di sr. Otmar Oduber.  Sr. Bikker ta distancia su mes di sr. Alonso Tromp cu ta bruha tera cu acusacionnan falso segun e politico.

Reunion urgente
Sr. Alonso Tromp di partido PDR a yama pa un Asamblea General cu urgencia segun statuto di PDR pa dia 18 di januari. Esaki ta pa trata un eleccion di directiva nobo pa PDR pa 2017/2018.  Bon Dia Aruba no a logra haya un reaccion for di sr. Alonso Tromp riba acusacionnan cu Andin Bikker a actua contra statuto di partido. Esaki ta e motibo pakico ta yama un reunion urgente pero segun sr. Andin Bikker: “sr.Alonso Tromp no ta miembro di bestuur pues e no por yama reunion. E reunion ey no tin validez.”

Segun sr. Bikker, despues cu Alonso Tromp no a haya un siguransa cu e tabata kier riba numerahe riba lista di POR, no obstante cu desde 2013 e no a profila su mes den politica mas, el a rabia y dicidi di uni cu opositornan di PDR pa purba bruha tera cu un wega di statuut. “E la lubida cu statuut ta wordo dirigi dor di principionan di buena fe den cual principionan ta ancra den articulo 17.  Ademas statutonan ta algo interno y semper por wordo adapta na situacion nobo, cual lo bay tuma luga tambe si ta necesario. Te asina cu por a check Sr. Tromp nunca aplica pa bira miembro di PDR y nunca no paga contribucion tampoco!”. Sr. Bikker ta sigui comenta cu ‘pesey pa medio di abogado a manda informa sr. Tromp recordando e pakico a dicidi di bay un cooperacion den e Plataforma Forsa Nobo, di cual e mes tabata un actor principal y cu e no ta miembro di PDR, tampoco cu e no tin ningun tipo di autoridad pa representa PDR. Na mes momento ta tene personalmente responsabel tambe.  Sr. Bikker ta splica: “Ta di lamenta cu sr. Alonso Tromp visiblemente a cay den wega di opositornan djies paso e no a haya su kier. En todo caso cerca PDR e no tin nada di busca y e no ta keri tampoco y mas bien su presencia tabata wordo tolera desde cu na 2014 ela agredi un candidato den sede di partido y a falta lider respet.”

Protocol
Sr. Bikker ta splica cu den un rueda di prensa december 2016, nan a lesa y parti e protocol cu POR. “Aparentemente opositornan politico no kier compronde protocol.
E ta gewoon un ‘samenwerkings protocol’ e ta. Pues nos ta coopera cu otro pa dia di entrega lista – cumisamento di augustus – pa nos por tin un solo lista. E storianan cu lo a desolve Democracia Real etc ta cosnan cu ta hasta insulta mi inteligencia huridico.”
Sr. Bikker ta agrega cu bo no por desolve un organisacion sin bay Camara di Comercio y cana e procedura legal. Sr. Bikker ta bisa cu hopi entusiasmo cu: “Mi kier a djis bisa opositornan pa cuminsa custumbra cu e idea cu Andin, Otmar y otronan ta bay uni pa un lista pa eleccion venidero.”