Partido Democracia Real: “PDR ta existi y lo sigui existi!”
Partido Democracia Real (PDR) no a wordo desolvi anto lo keda existi segun lider y fundador Sr. Andin Bikker.
Diamars mainta Sr. Andin Bikker a informa via un comunicado cu PDR a ripara tin cierto grupo den partidonan tradicional ta spanta cu e union di PDR y POR. Segun PDR, esaki ta duna impresion cu nan no a compronde of no kier compronde e protocol anto ta plama informacion incorecto cu PDR lo a wordo desolvi. Segun Sr. Bikker, PDR a drenta den un acuerdo den forma di un protocol pa uni forsa den e eleccion venidero na 2017. PDR como organisacion ta forma parti integral di esaki unda tin por ehempel e derecho pa di su banda trece y propone candidato conhunto y yuda cu formacion y decisionnan cu ta wordo tuma conhuntamente. PDR ta keda miembro di International Democrat Union (IDU) y tin representacion den Parlamento. 
Na Venezuela por ehempel, un protocol di union a wordo aplica den e ultimo eleccion pa Parlamento (Asamblea) caminda partidonan existente den oposicion (manera partido ruman PDR den IDU, Proyecto Venezuela) a uni bao di un solo capa. Esaki yama Mesa di Unidad anto asina a logra gana eleccion di 6 di december 2015.
PDR ta lamenta cu oponentenan cu ta sostene partidonan tradicional ta purba malinforma pa trata na crea discordia. Segun Sr. Bikker: “Obviamente nan ta preocupa cu e potencial enorme di e union PDR/POR den e plataforma Forsa Nobo, sino nan no lo ta worry asina tanto cu e union historico aki.”
