ORANJESTAD – Pa exactamente 3’or di atardi, e grupo cu ta bisa di tin e autoridad pa bira e sigiente bestuur nobo di Partido Democracia Real (PDR) a entrega e cambionan oficial na Camara di Comercio. Esaki nifica cu oficialmente a inicia e proceso di control cu tin un duracion di 48 ora pa determina cu e cambionan aki ta corecto of no. Sr. Andin Bikker kende te ainda oficialmente ta presidente di e bestuur actual, a duna un conferencia di prensa parti mainta, categorisando e accion di e grupo manera algo di mala fe.
“Nos no ta acepta e reunion akinan, e ta un reunion ilegal.” Tabata parti di e prome palabranan cu Bikker a inicia e conferencia cune. Bikker ta splica cu e ta lamenta cu a warda pa su persona subi avion pa cumpli cu su trabou manera parlamentario pa despues via social media e nota cu a manda yama e asina yama un Algemene Leden Vergadering (ALV). Pa Bikker e ta keda algo cu ta molesti’e paso den su palabranan, e persona cu ta causando tur e problema aki door di no haya su kier, esta sr. Alonso Tromp, ta un amigo di dje pa hopi aña. Dado momento a hasta splica cu Tromp tabata negociando cu partido MEP y cu ta parse cu ta number abou e ta busca, no obstante cu e tin par di aña no activo den poltica.
Contrario na declaracion di Bikker indicando cu ta trata di un grupo di cinco persona, Bon Dia Aruba a constata cu e ALV yama pa e grupo nobo tabata consisti di dies persona. E partido ta consisti 29 candidato for di cual dies di nan incluiendo Bikker a ricibi un carta indicando cu nan a viola Art. 5 inciso 8, asina terminando nan miembrecia. Tin un miembro cu entrega su retiro desde 2013. E scenario aki ta haci cu ta keda 18 candidato cu tin derecho di voto pues lo tin mester di 10 persona pa forma un quorum (mayoria).
Bon Dia Aruba lo keda pendiente riba e desaroyo aki cu ta mustra di bira un disputa legal ya cu ambos grupo a manda un señal duidelijk cu lo bay corte asina cu e resultado di Camara di Comercio keda conoci.
