Diahuebs a keda firma un protocol entre minister di Finansa encarga cu departamento di Aduana, Angel Bermudez, y dirigentenan di Sindicato di Aduana di Aruba (SADA) pa trece paz laboral.
Muy specialmente den e temporada aki cu ta uno clave pa e gremio comercial, ya cu cantidad di container a wordo importa cu productonan destina pa e benta di Pasco y Aña Nobo.
Manera Bon Dia Aruba a yega di informa, diaranson ultimo tempran, personal uniforma di cuerpo di Duana representa pa SADA a bay den accion. Nan no tabata contento cu e contenido di e carta di minister Bermudez a manda pa nan como contesta na nan preocupacion riba e proceso di reorganisacion di e departamento aki. E carta tabata bunita traha pero su contenido practicamente no a aclara nan preocupacion, un di nan tin di haber cu e structura huridico y promocion di e personal di duana.
Pa busca un salida pacifico y dialoga, Mediador di Gobierno, Anselmo Pontilius a reuni separa e mesun dia ey cu dirigentenan di SADA y despues cu Minister Bermudez, y a base di nan combersacion a traha un acuerdo di principio o protocol cu a keda firma entre e partinan envolvi ayera. E firma di e protocol aki por a satisface ambos partido, muy specialmente e miembronan di SADA. Di e forma aki e miembronan di SADA sa cu tin un periodo definitivo particularmente riba e parti di nan exigencia rond di e reorganisacion di e departamento aki. E reorganisacion lo cuminsa na 2017 y mester caba na mei.
Mediador di Gobierno a yega di considera importante cu nan por a firma un documento den un tempo defini. Ademas el a recomenda e participacion di miembronan di SADA y tambe di parti di e ministerio encarga cu Duana, cu por guia e trayecto aki y cu periodicamente nan ta keda informa otro con e proceso ta canando y si tin obstaculo con pa supera nan.
