Paws Uni Aruba ta yega Madiki e weekend aki pa cuminsa cu nan campaña di sterilisacion

Den fin di siman Luna Foundation Aruba, hunto cu 11 fundacion mas di Aruba, ta bay inicia cu e campaña Paws Uni Aruba, un campaña cu ta enfoca den sterilisa mascota den diferente bario di Aruba. E prome bario ta bira Madiki.

“Bo ta sinti e emocion? E weekend aki un movecion ta cuminsa cu ta pa mehora bida riba nos isla. Un cambio di enfoke. Treciendo e barionan hunto pa ta miho pa nan animalnan. Poniendo e responsabilidad den nan man,” Zoey Conijn, presidente di Luna Foundation Aruba y e motor tras di campaña Paws Uni Aruba a expresa ariba rednan social.

Aunke e campaña ta enfoca den castra of sterilisa e mascotanan, doñonan cu tin un bestia cu ta castra of sterilisa caba, pero cu talbes mester di un cadena nobo, mester un corta di huña of mester haci horea limpi, por trece nan mascota tambe.

Paws Uni Aruba ta bay tin tent na unda tin diferente material disponibel pa doñonan di mascota por busca. Ademas di esaki nan ta ofrece transporte pa busca mascotanan, specialmente di adultonan mayor cu no por hiba nan mascota.

“Hunto nos lo haci’e miho pa nos animalnan. Nos ta stima nan, Nos ta proteha nan!! Fundacionnan ta uni pa haci nos isla Un Isla Feliz pa nos animalnan tambe,” Conijn a remarca.

E meta di e campaña ta cu e fundacionnan ta drenta den e bario, den e casnan pa opera e mascotanan y nan ta drenta pa papia cu e doñonan, educa nan y pa traha casnan di cacho unda mester, zorg pa e cacho ta bon mara y zorg pa e pushinan no ta den sushedad.

Den luna di juni e fundacionnan ya caba tabata den Madiki pa asina combersa cu e doñonan di mascota y informa nan di e campaña.

Conijn a conta Bon Dia Aruba anteriormente cu nan tabata kier drenta den e bario pa wak tambe si tin cachonan cu tin carpata y e ora ta duna nan un Nextguard y antibiotica di biaha pa ora ta tempo pa opera e mascota nan sa cu nan ta saludable cu nan por wordo opera.

E idea aki ta un soño di Conijn for di hopi tempo caba. El a conta cu for di su punto di bista e barionan cu tin e hendenan menos afortunado, cu no tin e recurso pa hiba nan mascota veterinario, ta esnan cu mas mester ayudo.