PAWA Dominicana su operacion suspendi pa 90 dia

Lo duna placa bek na cliente cu vuelo cancela

Aerolinea PAWA Dominicana ta lamenta decision cu a cay recien di autoridadnan Dominicano pa wanta e aerolinea na tera. E aerolinea lo ta dunando clientenan cu a ser afecta pa medidanan nan placa bek.

Segun informacion cu nos a haya, aerolinea PAWA Dominicana a haya nan mes den problema pa via di no haci pagonan na tempo pa autoridadnan Dominicano. Pe rason aki autoridadnan a dicidi di wanta e aerolinea na tera pa un periodo di 3 luna esta 90 dia. Nos a confirma cu PAWA na Santo Domingo, unda e aerolinea a perde nan licencia pa por opera cu e medida ta pa un periodo di 90 dia.

Winston Tavarez, presidente di fundacion Dominicana Juan Pablo Duarte na Aruba a manda un comunicado pidiendo autoridadnan di PAWA tanto na Aruba como na Santo Domingo pa bin cu un solucion pronto pa e personanan cu no a logra sali di Santo Domingo despues cu vuelonan a wordo cancela ayera merdia. Segun e presidente di e fundacion, anteriormente tabatin rumornan riba medionan social di un posibel medida tuma contra PAWA, pero confirmacion a cay te ayera merdia.

Algun ora despues cu e presidente di e fundacion a pidi PAWA pa comunica cu nan pasaheronan pa trece claridad con ta bay haya un vuelo of pa clientenan haya nan placa bek, PAWA Dominicana a emiti un comunicado unda ta priminti pa duna placa bek na clientenan cu a mira nan vuelonan cancela.

Ta spera cooperacion di autoridad pa reconsidera medida

Segun PAWA, e decision cu actualmente ta afectando miles di nan pasaheronan tabata den man di Hunta di Aviacion Civil (JAC) di Santo Domingo. Den e aerolinea su comunicado nan ta expresa cu: ‘PAWA semper a reconoce su obligacionnan pa cumpli cu autoridadnan. Pa por cumpli cu nan debidamente pa por sigui brinda servicio na clientenan nos ta pidi presidente di e republica Danilo Medina Sánchez y Conseho di Directornan di JAC pa reconsidera e decision’.

E aerolinea ta spera cu autoridadnan lo coopera hunto cu PAWA Dominicana pa asina por duna asistencia na e miles di Dominicanonan cu ta haya nan mes den medio di un fin di siman largo den bispo di celebracion di natalicio di Juan Pablo Duarte sin informacion ni claridad riba con nan lo por sigui nan biahenan. PAWA ta spera cu den proximo oranan lo por reconsidera e decision. Di nan banda nan lo ta dunando placa bek na esunnan cu a haya nan vuelonan cancela den e proximo simannan.

Nos a tuma contacto cu Aeropuerto Reina Beatrix pa asina confirma si nan lo tin mas informacion. Aeropuerto a informa cu nan a tende si di e medida pero cu esaki ta algo cu Directie Luchtvaart tin informacion riba dje. Nos a tuma contacto cu Eumar Koolman kende ta traha pa bureau di minister di transporte kende a confirma cu nan a haya un briefing chikito riba e topico. Pero lo ta papiando di manera mas extenso awe y lo duna un declaracion ora e situacion ta cla.