Paul McCartney a papia tocante e fin di The Beatles, completamente rechasando e declaracion cu e tabata responsabel pa e grupo su fin.
Durante un episodio di BBC su Radio 4 “This Cultural Life” cu ta plania pa lansa dia 23 di october, McCartney a bisa cu ta John Lennon tabata kier a disolve e grupo.
“Mi no a instiga e separacion di e grupo,” McCartney a bisa. “Esey tabata nos Johnny.”
E famoso banda su fanaticonan ya tin hopi tempo ta debati ken tabata responsabel pa e fin di e banda su carera hunto, cu hopi di nan señalando McCartney como e persona responsabel. Pero McCartney a conta cu Lennon su deseo di “libera su mes” tabata e motibo principal tras di e separacion.
Confusion, acusacionnan y rumornan plama tocante esaki a tuma luga pa motibo cu e manager a pidi e miembronan di e banda pa mantene e noticia aki entre nan te ora cu e logra conclui un cantidad di acuerdo y negoshi cu e tabatin andando, McCartney a bisa.
E entrevista ta bini den bista di Peter Jackson su documentl di 6 ora, cual lo ta un recuento di e ultimo lunanan di e banda. “The Beatles: Get Back,” plania pa lansa den november riba Disney+, lo bay revivi e momentonan unda cu e banda iconico a separa. McCartney su comentarionan prome a keda reporta pa The Observer.
Durante un entrevista cual tabata conduci pa John Wilson, a yega un momento unda cu Wilson a puntra McCartney tocante e decision di lansa como un solista, na cual McCartney a contesta “Stop aki. Ami no ta e persona cu a instiga e separacion. No no no no, John a drenta e camber un dia y a bisa ‘mi ta bay sali for di The Beatles.’ Esey ta instigacion di e separacion, of no?”
McCartney a expresa tristesa pa cu e separacion y fin di e banda, bisando cu e grupo te ainda tabata “lansando hopi bon contenido.”
“Esey tabata mi banda, e tabata mi trabao, e tabata mi bida. Kiermen, mi tabata kier a continua cune,” McCartney a expresa.
