Tres dia despues di detencion di minister Paul Croes, gobierno finalmente a kibra silencio ayera y laga sa cu no lo retira sr. Croes for di su posicion manera minister. Asina e ta keda minister sin cartera pero suspendi.

Ayera varios miembro di prensa a bini hunto na ex Bushiri hotel unda cu gobierno a anuncia e prome paso pa basha abao Bushiri Hotel y haci di dje un espacio publico. E interes di prensa tabata mas tanto riba haya un reaccion for di gobierno riba e detencion di minister Croes dialuna pasa. Gobierno su reaccion por medio di prome minister Mike Emans despues di dos dia cu e detencion a tuma luga ta: “Na prome luga un convivencia y solidaridad hopi grandi cu Paul y su famia. Esaki ta un momento di hopi dolor pa Paul, su famia , su amigonan y nos tur cu a conoce como un hoben cu un dedicacion grandi na servicio publico.”

For di dialuna pasa varios medio di comunicacion entre otro NoticiaCla, MasNoticia, Caribisch Netwerk y nos matutino mes a haci varios intento pa haya reaccion for di minister Eman sin por a logra. Prome minister Eman a splica cu e no a mira un necesidad pa bin cu un conferencia di prensa riba e tema aki pa motibo cu e pensamento riba e caso no a cambia. Con esaki ta afectando e partido AVP algun siman prome cu eleccion, e ta reacciona cu: “Na prome luga e pensamentonan mester ta cu e famia y no politica of gobernacion. Nos pensamentonan ta keda hopi cu e famianan y e dolor cu nan ta pasa aden. Y mi tin cu bisa cu e forma cu el a bay naturalmente tin su impacto riba muchanan den un famia etc.”

 

Ta keda minister sin cartera
Prome minister Mike Eman a relata cu manera sr. Croes mes a trece pa dilanti na inicio di e investigacion, cu lo tuma tur espacio pa Ministerio Publico por haci su trabao. “E tin un confiansa grandi den su inocencia. Y nos a tuma tambe hunto cu e posicion cu el a tuma, hunto cu e posicion cu gobierno mester a tuma pa pone e carteranan abao y duna husticia espacio y ta e mesun posicion cu nos tin na e momentonan aki.” Segun minister Eman, nan a haci tur cos caba den nan autoridad como gobierno pa por en todo caso haci e hopi cla cu un persona den e tramite aki no ta keda activo.

“Nos a splica na parlamento tambe ora cu e decision a wordo tuma, cu den otro paisnan caminda cu tin regulacionnan y procedura pa un caso asina, ta haci un decision cla entre un hende cu ta condena y un hende cu ta den un proceso penal sin veredicto final. Y e liña aki di entrega cartera y laga proceso cana ta den cuadro cu tur e liñanan cu tin constitucionalmente tambe na otro paisnan te ora yega momento cu tin claridad di e situacion.”

Cambio den constitucion

Den nos pais segun prome minister, no tin un claridad riba kico ta sosode den un caso specifico asina manera esaki. “Analisando e constitucion di otro paisnan, nos a aplica e mesun acercamento pa e tema aki. Un cambio den e constitucion ta encera un diferencia entre ora un persona ta condena of ta den proceso caminda no tin veredicto final.” Esaki no a wordo pasa ainda y segun Eman: “E ta un proceso di por lo menos dos aña prome cu bo por cambia un Staatsregeling (constitucion). Pero adelantando riba e Staatsregeling aki, nos a tuma e posicion cu e (Croes) mester a entrega tur su carteranan segun cu ta regla tambe den otro Staatsregeling.”

Bon Dia Aruba kier agrega cu tin mas interpretacion banda di esun cu sr. Eman a duna. Den otro paisnan ministernan sospecha di corupcion hopi biaha nan mes ta tuma nan retiro.

Envolvimento di minister Benny Sevinger
Nos a acerca minister Benny Sevinger kende tambe tabata presente ayera na e rueda di prensa.
Como cu e ta encarga cu asuntonan di stranhero y permiso, nos a puntra e mandatario si e lo por ta na altura di algun hende den su departamento of coordinado cu tambe lo por ta envolvi den caso Ibis. “Ami ta esun menos cu mester bisa ken lo por ta envolvi of no, esey ta pregunta pa Ministerio Publico. Simplemente Ministerio Publico tin cu haci su trabao y laga nos wak kico ta sali afo. Ami ta lanta mainta y mi ta traha. Ta na OM pa haci su investigacion riba cualkier topico, e mandatario a bisa”.

Ministerio Publico a comenta riba e pregunta aki durante conferencia di prensa dialuna pasa. PG van Dam a contesta cu:”E investigacion ta concentra rond di minister Paul Croes.”

E supuesto corupcion ta draai rond permisonan pa stranheronan cu kier traha na Aruba. Ayera OM a suspendi e detencion di un di e tramitadornan sospechoso (fam Schwengle), pues e ta den libertad awor.