Den un reunion yama den menos di 24 ora, hunto cu famia, amistadnan y sostenedonan, minister Paul Croes a anuncia cu e lo sigui pa dilanti conhuntamente cu partido AVP pa e siguiente eleccion.
Segun e mandatario, e lo sali di e experencia aki mas madura y e ta convenci cu tanto e como su personal di trabou lo sali inocente.
Segun informacion cu nos redaccion a ricibi, e mandatario no por a warda mas pa anuncia su regreso y haci esaki prome cu e conferencia di prensa cu tabata programa pa tuma luga cu su abogado Marije Vaders. E anuncio riba su mes a bay na un forma keto aunke cu sostenedonan tabata duna indicacion di un dia prome riba Facebook cu e minister lo haci e anuncio aki. E pagina ‘Todos con Paul’ tabata e unico pagina cu a pasa esaki en bibo.
Sr. Croes a indica cu e no a spera cu tanto hende lo t’ey presente y a gradici coleganan minister pa e sosten cu e la bin ta ricibi.
