Despues cu siman pasa el a informa su sostenedornan y ekipo di campaña riba e status di su mes politicamente, minister Paul Croes ta bisa awor cu e ta considerando di tuma su retiro como minister.

Diasabra el a organisa su prome encuentro cu prensa hunto cu su abogado Marije Vaders despues di un silencio hermetico riba investigacion penal contra su persona den caso di corupcion yama Ibis.

Sr. Croes: “Pueblo di Aruba por ta convenci cu cualkier acusacion cu bin na mi persona den e caso aki mi lo demostra mi inocencia na final di dia di acusacionnan aki cu ta bini for di un skina politico.” Despues cu autoridadnan a haci entrada hudicial na su hogar, a scoge na momentonan ey bao conseho di abogado pa no duna ningun declaracion na prensa, e ta declara. Esaki pa motibo cu pa nan mes te na momento aki no tin claridad riba e caso penal Ibis, contra su persona y algun trahado di su oficina.

Evaluando retiro
Sr. Croes a laga sa cu e ta spera cu e caso aki no lo bay dura asina hopi pero aparentemente e ta bayendo pa mas cu tres luna. “E ta algo nobo mi ta kere pa diferente hurista cu a pasa den e tipo di caso aki. Cu bo ta inicia bo investigacion riba un entrada hudicial.”  E tardansa aki ta pone sr. Croes evalua con largo e asunto aki ta bay dura y si tin hustificacion pa ta riba ‘non actief’ aworaki pa asina largo. Pues e ta riba su mesun motivacion y iniciativa segun sr. Croes pa acerca gobierno den curso di e siman aki of dos siman pa mira e siguiente paso:  Pa reevalua posicion di ‘non actief’, si ta continua riba esaki of si ta tuma retiro completo.

Sr. Croes ta bisa riba pregunta pakico no a entrega retiro ainda: “Si bo wordo acusa di algo cu bo mes ta sigur bo ta inocente di dje, automaticamente ta bira hopi dificil pa tuma decision di tuma bo retiro den e caso aki como minister. Pasobra lo por indica cierto culpabilidad. Den mi caso esey tabata e motivacion principal, 100% di mi inocencia di acusacionnan cu por bin. Pa tal motibo mi a scoge pa un tussenweg mientrastanto nos a spera cu e caso por bay mas lihe.”

Falta informacion di OM
E ta sigui cu: “No por ta asina cu bo ta haci un entrada hudicial di e embergadura aki na mi cas na momento cu bo ta lantando for di soño preparando pa cuminsa dia di trabao. Y no ta duna niun informacion despues di esaki na un ciudadano cu tin su derechonan riba obtene informacion y claridad en todo caso pa asina defende bo mes, contra aresta ponencia cu por wordo treci pa dilanti den un investigacion di un caso penal.” Te na momentonan aki informacionnan cu nan a ricibi despues di hopi persistencia segun sr. Croes di parti di su abogado Vaders, ta minimo y basicamente nada pa asina nan por duna algun comentario riba e caso.

Abogado Vaders: proceso no ta normal
Segun abogado Marije Vaders, e proceso aki den e caso Ibis “no ta uno normal.”
“Normalmente despues di entradanan hudicial, tin acusacionnan fuerte, hende ta wordo deteni anto e proceso penal ta cuminsa.  Bo ta haya documento y bo ta bay den un estado cu bo por defende bo mes. Pasobra bo ta haya informacion a base di kico bo ta wordo sospecha anto esey ta duna bo e oportunidad pa bringa e acusacionnan.” Pues den e caso di minister Croes, e ta laga sa cu yen cos ta wordo bisa, yen acusacion tira sr. Croes su cabes pero di nan banda nan no por haci nada. Sra. Vaders: “Mi ta spera cu pronto nos haya tur documentonan pero den esey mi ta pensa tambe cu mirando e manera con e cosnan a bay, nos tin cu puntra nos mes si ainda sr. Croes por tin un proceso husto. Pasobra ya caba tanto daño a wordo haci sin cu nos por haci nada.”

E informacion cu nan tin te aworaki ta consisti di 10/15 pagina segun e abogado, cual no ta hustifica tur e cosnan cu nan ta tende den prensa y informacion cu Ministerio Publico ta suministra. Manera Bon Dia Aruba ya a publica, Ministerio Publico no kier reacciona riba e comentario di e abogado.

Su carera politico lo continua
Sr. Croes a anuncia atrobe den e rueda di prensa aki cu su carera politico no a termina. Su carera politico lo continua y nan lo naturalmente desea pa tin claridad den e caso lo mas pronto posibel. Pa asina laga su abogado trata e aspecto penal y sr. Croes haci locual e ta haci miho segun e ta describi, cual ta politica. “Nos lo kier warda si pa mira cada paso tuma door di e autoridadnan pero nos tambe tin cu sigui pa dilanti.” Diasabra mes despues di e conferencia aki sr. Croes a drenta e districto di Noord pa campaña cual e ta considera ‘su districto’ politicamente, y unda segun algun fuente el a wordo bon ricibi door di su sostenedonan.

Momentonan traumatico
Sr. Croes a describi e momentonan aki como momentonan traumatico pa e embergadura y forma cu esaki a sosode riba 28 di maart. Diasabra ultimo a scoge en todo caso pa respet pa comunidad y prensa di Aruba, pa bin un rato pa dilanti informa cu nan ta para mesun caminda. “E no ta den nos man pa e continuacion di e caso aki. Mi abogado na varios ocasion a trata na haya informacion for di Ministerio Publico, for di autoridadnan envolvi, pero lamentablemente esaki not a sosodiendo na e forma diligente of den forma cu un ciudadano tin derecho riba dje.”

Ministerio Publico a laga sa cu esaki ta un investigacion amplio y cu lo trata e caso aki den un forma deligente y respeta derecho di cada ciudadano. “Mi mester insisti den e caso aki cu esaki no ta sosodiendo despues di casi 90 dia di a haci entrada hudicial na mi cas. Te na momentonan aki nos no a ricibi informacion manera cu nos a spera”, asina sr. Croes ta enfatisa atrobe.