E caso di ex-mandatario Paul Croes recientemente a conoce e sentencia di Corte Superior (HOF). Na final el a wordo condena cu tres aña di prison pa seis delito, entre otro, labamento di placa, participacion den un organisacion criminal y acepta y pidi soborno.

Corte Superior a conclui cu Paul Croes, entre e periodo di 31 di october di 2013 te cu 28 di maart di 2017, a participa den un organisacion criminal den cooperacion cu otro sospechosonan, kendenan ta Roque Aparicio, Giovanni Capriles, Juancho Filiciana y Selma Arends. Segun Corte Superior, e grupo intencionalmente a comete hechonan castigabel, entre otro, nan a acepta y pidi soborno, sustraccion (Verduistering) den conhunto.

Loke a hala Bon Dia Aruba su atencion ta cu Croes a declara varios biaha publicamente y den sala di Corte cu e no ta reconoce su mes den e acusacionnan, ni di a participa den un organisacion criminal despues cu 4 hues a conden’e. E prome hues ta di Corte di Prome Instancia y despues tres hues di Corte Superior a ratifica e sentencia, cu efectivamente el a comete tur e echonan castigabel.

Organisacion Criminal

E elemento ‘organisacion’ ta e definicion cardinal di e articulo 2:79 di Codigo Penal di Aruba. Sin participacion no tin organisacion. Segun e articulo aki, pa por bisa cu e ta un organisacion criminal, tin cu cumpli cu tres criterio: tin un cooperacion mutuo entre e sospechosonan; tin un cierto structura; y mester tin un continuacion.

E organisacion aki su structura no mester ta grandi, mester tin minimo dos sospechoso y no necesariamente e sospechosonan den organisacion mester conoce otro. Ademas door cu ta un organisacion criminal, nan no tin exigencianan pa cumpli ni ta mara na tempo di existencia, y no mester tin deliberacion. E unico intencion di e organisacion ta pa comete actonan criminal.

Articulo 2:79 ta regarda pa proteha e comunidad contra e peliger di e sorto di organisacionnan criminal aki, cu ta dirigi specialmente riba colaboracionnan mutuo cu nan mesun dinamismo, cu ta un riesgo grandi pa comete e hechonan castigabel aki. Articulo 2:79 aki di Codigo Penal di Aruba ta pa evita e existencia di cierto gruponan cu e intencion di comete actonan criminal.

Paul Croes y Organisacion Criminal den Cocolishi

Structura: Croes a cuminsa su funcion como minister di Asuntonan Social, Hubentud y Labor den gabinete Mike Eman II na october 30 di 2013 tempo cu el a huramenta. Bao su mando e tabatin tres persona crucial cu a yud’e pa crea un structura criminal, unda cu Giovanni Capriles tabata coordinador y presidente di su fundacion, Leadership & Excellence; Selma Arends cu tabata su secretaria y tambe su prima; ademas di Roque Aparicio, cu ta su amigo personal cu a fungi como coordinador y chauffeur di ex-minister Croes.

For di eynan e organisacion criminal a cuminsa haya forma (structura), unda cu e ‘ontheffingenfabriek’ – manera Ministerio Publico a yam’e – a inicia, cu e colaboracion di otro 3 persona. Esakinan ta Juancho Filiciana, kende tabata e tramitador di permiso principal y un persona crucial den e organisacion; bao di Juancho cu ta Aleida Vasquez, propietario di Bashaka Services & Enterprises NV y su ex-pareha Felipe Schwengle, cu tabata falsifica documento y haci estafa.

Cooperacion: Pa un organisacion asina por funciona mester tin cooperacion entre e sospechosonan. Den e caso specifico aki di Paul Croes, e structura tabata asina bon hinca den otro cu via su fundacion Leadership & Excellence, na unda cu Capriles tabata su persona di confiansa, tabata ricibi un cantidad di soborno via e cuenta bancario di e fundacion. No solamente Croes tabata ricibi soborno, sino cu personalmente e hunto cu su chauffeur tabata haya diferente productonan comestibel, alcohol y placa efectivo a cambio di un firma di un ontheffing.

Di otro banda, tambe Selma Arends, kende tabata fungi como secretaria, tabata yama na diferente compania for di Cocolishi pa pidi soborno, na unda cu e tabata forsa e hendenan cu a cumpra ontheffing for di Paul Croes pa cumpra carchi di concierto di Pasco y pa deposita e placa riba cuenta di e fundacion.

Entre Croes cu Juancho Filiciana tambe tabatin bon cooperacion, na unda cu ora Filiciana tabata tramita un permiso e tabata duna Croes un cierto cantidad di placa pa e ontheffing. Dia 28 di maart di 2017 a haci un entrada hudicial na Filiciana su cas, na unda Landsrecherche a haya cinco envelop cu e nomber di Paul Croes, cada un cu 1.000, 2.000, 2.500, 3.000, 3.500 skirbi riba nan.

Continuacion: E hechonan castigabel aki a wordo haci den periodo di aproximadamente cuater aña, for di 30 di october di 2013 te cu 28 di maart di 2017, den colaboracion cu e sospechosonan Aparicio, Capriles, Filiciana y Arends, na unda cu nan a comete den conhunto e delitonan di pidi y acepta soborno y sustraccion (verduistering) intencionalmente.

Dia 31 di maart di 2017 Croes a entrega su funcion como minister.

*Algun potret den e grafico ta cortesia di 24ora.