Pastoor Toti Fuentebella a informa cu parokia di Paradera Santa Filomena ta bay celebra 75 aña di existencia y en conexion cu e celebracion aki nan kier haci algun renobacion den e misa ya cu su ultimo renobacion tabata na 2015.
E verf di e misa tanto paden y pafo ta na mal estado segun e pastoor ta indica y e ta sigura cu a yega tempo pa por sigui mantene loke a ser haci casi nuebe aña pasa, nan a haya un quotation di un compania caba cu por haci e trabou aki ademas di drecha e murayanan kibra loke ta duna un total di 84.000 florin.
Tambe den e dañonan di infrastructura cu e misa tin na e momentonan aki por ser aprecia den bentananan di vitral, algun parti di e vloer ta kibra specialmente band’i e santuario y debi cu nos ta den un isla saltpeter ta causa dañonan considerabel den otro aspectonan na unda nan tin problema cu esey, santuario ta sufriendo di leak y awa ta drenta den e plafond.
Pa e motibo aki nan ta bay organisa un evento pa recauda fondonan manera nan a haci 2016 ora e parokia a haci un fiesta bailabel un anochi prome cu dia di mama na 2016 na unda nan a recolecta 60 mil florin e tempo ey, manera pastoor Toti ta conta.
E aña aki dia di mama ta cay 12 di mei y nan tin e fiesta bailabel plania pa dia 11 di mei na Renaissance Convention Center for di 8or di anochi te cu 2or di marduga cu e presentacion di bandanan como Metropolis, N’Fuzion y Robert Jeandor y su Solo Banda Show, pa personanan interesa pa carchinan por acerca na pastoor Toti na Misa di Paradera.
Pa finalisa, pastoor Toti y parti di e comision di misa di Paradera kier a pidi comunidad pa yuda duna un man na e proyecto aki vooral e temporada aki cu ta di cuaresma y tambe pa celebra e 75 aña di misa di Paradera.
