(AP) – Na momento cu un publicacion religioso a usa data di un app di smartphone pa deduci e orientacion sexual di un oficial di rango halto den iglesia Catolico Romano, e ta expone un problema cu ta bay mas leu cu un debate riba doctrina di iglesia y celibato di pastoor.
Cu tiki restriccion na Merca riba kico companianan mag di haci cu e cantidad enorme di data cu nan ta colecta di bishitanan na website, app y tracking di ubicacion construi den celularnan, no tin hopi pa stop spionahe similar riba politico-, celebridadnan y cualkier persona cu ta obhetivo di curiosidad – of maldad – di un persona.
Citando acusacionnan di ‘posibel conducta inapropia’, Confederacion Mericano di Obispo a anuncia e siman aki e renuncia di su top oficial administrativo, Monsignor Jeffrey Burrill, prome cu un reporte di noticiero Catolico, The Pillar, cu a investiga su bida romantico priva.
The Pillar a bisa cu a obtene data di ubicacion ‘comercialmente disponibel’ di un proveedor no nombra, cu a ‘corelaciona’ na celular di Burrill pa determina cu el a bishita barnan gay y residencianan priva usando Grindr, un app di cita popular entre personanan homosexual.
“Casonan asina ta bay multiplica”, segun Alvaro Bedoya, director di Centro pa Privacidad y Tecnologia na scol di ley Georgetown.
Activistanan di privacidad pa largo ta exigi leynan cu lo preveni abusonan asina, maske na Merca nan ta existi apenas den algun estado, y aki den diferente forma. Bedoya a bisa cu retiro di Burrill mester enfatisa e peliger di e situacion aki, y finalmente mester duna impulso na Congreso y Comision Federal di Comercio (FTC) pa actua.
Preocupacion pa privacidad hopi biaha ta construi den terminonan abstracto, el a bisa, mientras ‘realmente ta trata si bo por explora bo sexualidad sin miedo cu bo dunado di trabao ta bay duna bo retiro? Bo por biba den paz despues di un relacion abusivo sin miedo?’ Cantidad di victima di abuso ta tuma gran cuidao pa sigura cu nan abusador no por haya nan atrobe.
Como un miembro di personal congresional na 2012, Bedoya a traha riba legislacion cu lo a prohibi appnan cu ta permiti abusadornan secretamente track ubicacion di nan victimanan mediante data di app. Pero esaki nunca a pasa.
Defensornan di privacidad ta bin advertiendo pa añas cu data personal y di ubicacion colecta pa promotornan y amasa y bendi pa brokernan por ser usa pa identifica individuonan, no ta sigur manera mester ta, y no ta regula pa ley cu ta rekeri e permiso cla di e persona. Tanto proteccionnan legal como tecnico ta necesario pa asina usuarionan di smartphone por pusha back, nan ta bisa.
The Pillar a alega ‘mal conducta sexual serial’ di Burrill – actividad homosexual ta un pica bao doctrina Catolico, y pastoornan ta spera di keda celibe. Website di e publicacion ta describi e noticiero como enfoca riba periodismo investigativo cu ‘por yuda Iglesa sirbi miho su mision sagrado, salbacion di almanan’.
Su editornan no a responde na peticionnan pa comentario diahuebs riba con a obtene e data. E reporte a bisa solamente cu e data a bin di brokernan cu ta agrega y bende data di señal di app, y cu e publicacion tambe a contrata un compania di consulting di data independiente pa autentica esaki.
Tin brokernan cu ta cobra miles di dollar pa luna pa cantidadnan enorme di data di ubicacion, algun di cual ta bendi no solamente na promotornan sino doñonan di cas, deurwaarder, y ‘bounty hunter’, segun John Davisson, consehero senior na e Centro di Informacion di Privacidad Electronico. El a bisa cu un persona buscando pa ‘reverse engineer’ data di un persona particular for di un pakete en masa potencialmente por hay’e di un di e cantidad di cliente den e cadena di data. “Ta sorprendentemente y preocupantemente facil pa obtene data di ubicacion deriva di celularnan”, Davisson a bisa.
Sen. Ron Wyden di Oregon a bisa cu e incidente ta confirma atrobe e falta di honestidad di un industria cu falsamente ta bisa di salvaguardia privacidad di usuarionan. “Brokernan di data y companianan di aviso a gaña publico, sigurando nan cu e informacion cu nan a colecta tabata anonimo. Manera e episodio horibel aki ta demostra, e declaracionnan tabata falso – por track y identifica individuonan.”
Wyden y otro legisladornan a pidi FTC aña pasa investiga e industria.
Vigilante di privacidad di data di Noruega a conclui e aña aki cu Grindr a comparti data personal di usuarionan cu un cantidad di partidonan tercero sin base legal y a bisa cu lo impone un multa di $11.7 miyon, igual na 10% di e entrada global di e compania di California.
E data cu ta leak na companianan di aviso pa avisonan enfoca ta inclui ubicacion GPS, informacion di perfil di usuario, como tambe e simpel hecho cu individuonan particular tabata usando Grindr, loke por indica nan orientacion sexual.
Comparti informacion asina por pone un persona na riesgo di bira un victima. Autoridad di proteccion di data Noruego a argumenta cu e forma con Grindr ta pidi usuarionan permiso pa usa nan informacion ta viola rekisitonan di UE pa ‘permiso valido’, pasobra no a duna opcion di no comparti data cu terceronan y tabata obliga pa acepta politica di privacidad di Grindr den su totalidad, ademas cu no a informa usuarionan adecuadamente riba intercambio di data.
E partnernan di aviso cu cual Grindr a comparti data ta inclui Twitter, servicio Xandr di AT&T, y otro companianan di aviso tecnologico, OpenX, AdColony y Smaato, e vigilante Noruego a bisa.
