Pastoor Jairo Maduro tocante su participacion den carnaval: “Nunca den mi curason tin mundanidad ora cu mi ta participa den e cosnan aki”

Pastoor Jairo Maduro ta un figura di comunidad y e aña aki el a dicidi di drenta mas den comunidad a traves di musica di carnaval, un decision cu hopi ta aplaudi, pero cu hopi otro tambe ta rechasa. Den un entrevista cu Bon Dia Aruba Pastoor Jairo ta conta kico a hib’e na participa den festival di Caiso y Soca, y kico ta su punto di bista ariba celebracion di carnaval pa un Cristian.

Actualmente e ta pastoor di Parokia di Santa Cruz y ta bay celebra 20 aña como sacerdote e aña aki. E ta conta cu semper el a gusta musica, desde cu e tabata mucha. El a bay les di trompet desde su 14 aña na Scol di Musica y despues el a toca den Orkesta Harmonica, den diferente koor di misa tanto na Aruba como na Corsou y a toca den Brassband tambe den temporada di carnaval y actualmente ta toca den Kerki Protestant.

Prome cu el a bay canta musica di carnaval, semper e tabata gusta canta. El a sigui conta cu el a canta solista den diferente koor, el graba den studio pa prome biaha na Corsou y di eynan el a canta den e diferente koornan na Aruba. Despues el a participa na un concierto di Pasco cu Koor Santa Famia y a hasta graba cu un CD di Pasco cu nan.

Pa loke ta e asunto di canta soca, Pastoor Jairo ta splica, cu pa basta aña Ofo di e banda Nfuzion ta pidie pa canta soca. El remarca cu aunke e ta un hende cu gusta Soca y Calypso, e no tabata mira cu mes pa canta esey.

“E biaha aki mi a bisa si. Aña pasa mi mester a bay pero nan a skirbi un letter di cantica cu mi no a gusta hopi y mi no a canta. Aworaki si mi a bay cu un Power Soca. Mi a bisa nan cu mi tabata kier bay cu un Power Soca y mi a bisa nan cu mi kier nan trah’e cu hopi pikete pa nos move e hendenan,” el a indica.

Asina Dolfi Richardson, Danny Koolman y Nigel Hoek a sinta hunto y di eynan e Power Soca di The Priest a bin. El a splica cu cada un a pone nan toke den dje y haci’e un soca combina cu tin e parti di opera den dje, e tin e ritmo moderno di e hobennan y e tin e parti di soca mes.

“Mi a haya e cantica bon, mi a wak cu e letternan ta bon y e ora mi a bay den pre-finals. Esey tabata un dushi experiencia y ya asina mi a cay den finalista,”el a agrega.

E decision di participa den carnaval a trece controversia den comunidad y pa Pastro Jairo esey tabata algo cu e tabata spera.

“Aki na Aruba mi ta spera tur cos. Desde cu mi a yega Aruba semper mi forma y mi sistema di sacerdocio tin biaha ta bay un poco fuera di e liña, no den mal sentido, si no mi ta bay un extra kilometer den tur loke mi ta haci,”el a enfatisa,

El a subraya cu e ta presenta su mes como un sacerdote cercano cu hende, drentando den tur sorto di ambiente sin cu esey ta afecta su bida sacerdotal. El a señala cu en berdad hende ta mira e sacerdote den carnaval y ta cuestiona pakico e ta eynan, pero el resalta cu e hendenan ey no ta mira con fuerte e ta den su conviccionnan.

“Tin hende a bisa mi cu ya por ta mi ta bay stop di ta pastoor. No, niun dia mi ta pensa esey. Manera mi a bisa mi ta bay haci 20 aña sacerdote y mi ta hopi feliz como sacerdote. Eynan mi ta sinti mi realisa, eynan mi ta sinti den mi curason cu esey ta mi luga cu Dios a pone mi y toch e kier pa mi desempeña den tur mi talentonan cu e mes a duna mi, como forma di trece hende hunto. Nunca den mi curason tin mundanidad ora cu mi ta participa den e cosnan aki. Mi ta un hende cu ta resa hopi, mi ta haci misa tur dia y mi relacion cu Dios semper ta uno cu ta hopi stabiel,” el a subraya.

Pastoor Jairo ta splica cu tin hopi hende tin diferente forma di expresa den carnaval. For di su punto di bista carnaval por bira hopi cos, e por bira un cos malo of e por bira un cos bon, y cosnan malo ta tuma luga henter aña, pero momento di carnaval ta momento cu mas ta sali pa dilanti e comentarionan malo.

El a remarca cu na final di dia tur hende tin cu comporta pasobra mal actitud di un forma personal ta trece consecuencia pa e persona.

“Si bo no comporta e ta bay trece consecuencia, abo ta dicidi si bo ta haci’e fout of no. Ami a djis drenta memey di hende. Ami ta djis bay como yiu di e pueblo aki. Mi sa kico ta carnaval, mi semper a bay carnaval, no den dje pasobra aworaki ta prome biaha mi ta den dje cu e actividad di cantamento, pero mi ta bay cordando semper cu mi ta sacerdote. Mi no ta bay haci un cos cu ta tira mancha ariba loke mi ta, mi ta bay semper cu bon comportacion,” el a indica.

Den un caso cu e mester encontra cu hendenan cu kier haci di mas of haci cosnan descabeya, el a splica cu na e momento asina e ta wanta e distancia pasobra e no ta tolera cosnan descabeya ni cos loco. El a indica cu ariba caminda tambe tin security pa e grupo y pa e banda y e banda ta tene cuenta cu e aña aki tin u Pastoor participando y pues mester ta mas cuidadoso pa esaki.

Un di e controversianan cu tin den comunidad ta cu hopi Cristian, ta considera Carnaval un fiesta pagano. Pastoor Jairo ta splica cu paganismo y e cristianismo ta den e curason di e hende. “Ami ta Cristian y mi adoracion ta na Dios. E fiesta ta abo ta dun’e contenido. Carnaval ta mara na hopi historia di pasado, pero tur cos ta cambia cu tempo,” el a bisa.

El a sigui splica cu su participacion, specialmente den canto, no ta lag’e sinti cu e ta dunando un adoracion na un Dios cu no ta Dios di berdad. El a conta cu hopi biaha e ta cana riba ruta di carnaval y e ta sorprende e hendenan. “Nan ta puntra mi ki bo ta haci akinan, pero mi ta wak abo riba ruta y mi ta wak bo den misa,” el a remarca.

“Mi a haya poco atakenan fuerte, pero e ora ey semper mi ta bisa mi adoracion ta pa Dios, bo no ta wak mi paden, bo no conoce mi curason, bo no conoce mi spiritualidad, bo no conoce mi relacion cu Dios. Si Dios ta duna mi tur e talentonan aki, pakico mi mester hisa y bent’e?,” el a agrega.

Como Pastoor, el a indica, e ta gusta bay hopi caminda, pasobra e no por keda solamente pa den. E ta un hende cu ta predicador y e mester tin conocemento di tur cos y for di su punto di bista, esaki ta yud’e.

“E bida ki ta un so y den dje bo no por haci coy kens cu ta marca bo pa full bo bida y cu bo ta bay tin consecuencia pa henter bo bida. Kiermen bo tin cu comporta bo semper. Mi ta corda cu mi ta un bon Cristian, mi ta corda cu mi ta un sacerdote, mi ta paga tino cu masha hopi cos y mi ta disfruta,” el a enfatisa.

Por ultimo, Pastoor Jairo ta brinda un mensahe importante na henter comunidad: “Mi ta tuma e conseho cu Pastoor Daniel Spila a yega di bisa un biaha. Durante tempo di carnaval nos ta cuida curpa y nos ta cuida alma y esey ta mara na nos bon comportacion. Tin hopi cosnan malo ta tuma luga berdad, pero esey tambe ta tuma luga den henter aña. Carnaval ta un celebracion marca na Aruba, kiermen cu semper nos a bay carnaval y di mucha mi a mira tur esaki y e ta algo cu ta bay keda tuma luga na Aruba y cu no ta bay cambia. Abo ta dicidi si den bo curason e ta un fiesta pagano of e ta un fiesta cu no ta bay haci un daño na bo spiritualidad y bo fe, y na bo relacion y adoracion cu Dios.”