A3 16jul, NP, pastoor jairo maduro (2).jpg

Bon Dia Aruba a tene un entrevista cu Pastoor Jairo Maduro pa mira con e prevalencia di religion ta den comunidad Arubano. Y si pastoor ta kere cu e cantidad di hende religioso ta bahando mas y mas cada aña. Pastoor Maduro a bisa cu e cantidad di hendenan religioso ta varia cada aña. Pero e hende riba su mes ta keda hende religioso.

 

Pa loke ta e misanan, Pastoor Maduro a bisa cu e misanan ta yen y ta confia y hinca fe den misa pa tur nan problemanan. Pa e aspectonan aki primordialmente pastoor a splica cu e aspecto di fe ta hunga un rol grandi den bida di hende. “Cu e ta bayendo atras, por bisa cu den tur cos por bay atras un tiki. No ta tur ora bo por ta mesun cos cu tur hende tur ora. Realidad ta cu nos di iglesia Catolico tin e mayoria na Aruba anto pues no por bisa cu a bay atras. Tin cosnan cu nos por mehora si manera e poblacion Catolico mester por busca di sa di su fe.” Esaki segun Pastoor ta enfatisa ta algo cu por ta un problema. Hopi hende ta bin misa y djis resa pero mas profundo nan no ta bay hopi biaha. A puntra Pastoor Maduro con e ta haya cu e presencia di hoben ta den misa, el a bisa cu te ainda ta mira presencia di hoben den iglesia y tin hopi cos cu ta yama atencion di hobennan manera tecnologia awendia, kiermen e hobennan t’ey, pero si nan presencia por mehora.

 

Hopi no tin bida di fe stabiel

Catolico ainda ta e religion mas grandi na Aruba (9 parokia), pero locual ta ripara ta cu hopi hende ta un religion pa custumber di famia. Nan ta batisa, ricibi y confirma, pero despues di esey ta corda riba misa ocasionalmente manera pa un entiero of dianan di celebracion manera Pasco. Esaki ta algo cu Pastoor ta ripara, pues cu a pesar cu nan ta un religion, nan no tin un bida di fe stabiel y serio. E ora si mayornan ta asina, e muchanan no tin nada pa tuma over, si nan no ta mir’e cerca di mayornan.

 

Tarea Pastoor

Banda di e misanan semanal, tur dia tin casonan di problema cu Pastoor ta atende cun’e, manera ta bishita hende malo, bishita hendenan cu ta muriendo, ta bishita famianan cu ta den problema, famianan den necesidad unda cu tin asistencia pa yuda nan. “Nos trabou ta hopi, contrario na locual hopi hende ta pensa cu un pastoor no ta haci nada henter dia. Tin biaha tin 2 of 3 entiero riba un dia y anochi tin misa y reunion etc.”

 

Cambio

Pastoor Maduro ta bay haci 12 aña como Pastoor e fin di luna aki. Bon Dia Aruba a puntra Sr. Maduro con e ta haya cu misa a cambia desde 12 aña pasa pa awo. El a splica cu tempo cu el a cuminsa hendenan tabata mas ferviente, pero diripiente ta mira cu tin cambio y cu a bay atras den bida di fe. Pastoor a splica cu e prome añanan e no a traha na Aruba, y ora cu el a bin bek el a nota e cambio aki. Hasta den e forma di trato cu Pastoornan y ta kere cu politica tambe a hunga un rol den esaki, como algo cu ta pone cu hende ta bay den discordia cu otro y hasta Pastoor ta haya su mes den problema tin ora. Tin ora ta parce cu e Pastoor no por bisa nada y e no por predica, cual segun Pastoor Maduro cos no por sigui bay asina.

 

Locual cu e ta haci pa mantene e animo di hendenan pa mantene nan fe den e religion ta cu nan ta resa hopi y ta keda anima e pueblo cu curashi. E no ta facil mas awendia y ta keda anima e pueblo di Dios y por sinti satisfecho cu hende ta keda cu e bida di fe.

 

A pesar cu e religion Catolico ta esun di mas grandi aki na Aruba e no ta un religion cu bo ta mira riba caya reclutando hende pa bin e misa. Esey no ta algo cu e religion Catolico ta haci, segun Pastoor Maduro. Pero por medio di grupo cu ta forma, di por ehempel mucha y hoben, ta busca tur manera di yega na tur hende. Tin parokianan cu tin gruponan cu ta reuni tur siman etc. Y nan ta anima e gruponan por ehempel di muchanan pa bay misa, cual ta algo cu ta haci hopi awendia. “Tin hopi cos cu ta yama atencion di muchanan, nan ta keda facilmente y comodamente cu un laptop of tablet den nan man y nan ta prefera esey en bes di bin misa. Eseynan ta parti di e reto cu nos ta haya.” Segun Pastoor, preguntanan cu muchanan ta bin misa cun’e semper ta preguntanan hopi critico y nan ta cuestiona Bijbel y historia y tambe cosnan cu ta bay robes den iglesia.

 

Terminando a trece e situacion recien di hopi desacuerdo cu tin den comunidad. Ultimo por a mira hopi division den comunidad pa loke ta hendenan cu ta pro y contra e manera cu nos mester biba segun bijbel. A puntra Pastoor Maduro si esaki por tin di haber cu e ultimo tempo hopi hende no ta biba un bida hopi religioso mas y ta djis batisa pa e religion. Segun Pastoor Maduro: “Hopi hende ta pensa cu nos tin un Dios cu ta pa capricho, y no ta asina. Dios a crea nos y e ta exigi nos cierto cosnan pasobra el a crea nos y e kier nos salbacion. P’esey su palabra no ta caduca dilanti di ningun ley y su mandamento ta riba tur ley. Hopi biaha hende ta piki algun cos di palabra di Dios y nan no ta piki e palabranan den totalidad, sino solamente locual ta aplicabel y ta cumbini nan,” el a termina bisando.