— For di vocero di Ministerio Publico, Ann Angela, Bon Dia Aruba a haya confirmacion cu a antayera a detene e conocido pastoor y musico J. S., despues cu a entrega denuncia contra su persona di acoso sexual di un mucha.
S. cu ta maneha un traimerdia na Primavera, lo a mishi cu pecho y parti intimo di un mucha muhe di 10 aña. E criatura lo a bisa su mama, kende a graba su declaracion cu su telefon y a warda di polis pa haci denuncia. E acto lo mester a tuma luga diaranson dos siman pasa na e traimerdia. E mesun dia e mama a acudi na warda di Santa Cruz. E proximo dia a tene un cita na JZP. E mucha mes a haci su declaracion e diasabra despues. Antayera S. a wordo deteni. Sinembargo e no a keda cera. Mientras tanto e mama a dicidi pa hiba su storia na prensa local. Motibo dicon S. a bay liber ta cu fiscal ta bay warda awor riba e proces-verbaal di JZP pa wak con ta sigui, asina vocero di OM ta splica Bon Dia Aruba. E no kier bisa si esey kiermen cu S. lo por wordo deteni atrobe. “Mi no kier bisa si ni no. En teoria si logicamente, pero mi ta pensa cu den e fase aki ta miho pa warda pa JZP haya chens pa pone cosnan riba papel y e proces-verbaal drenta”, segun Angela.
