Consul di Colombia, Mirza Gnecco a informa cu entrante dialuna ultimo, consulado a cuminsa procesa un paspoort nobo Colombiano. Tambe el a anuncia e actividadnan cu nan lo organisa den cuadro di Dia di Colombia, diabierna awor.
E diplomatico a bisa cu e Colombianonan cu ta desea pa tramita e paspoort nobo aki, nan por acerca na nan sede consular. El a aclaria cu e adkisicion di e paspoort aki no ta obligatorio.
El a bisa cu no ta necesario cu e personanan cu tin e paspoort di lectura mecanico of chip, no mester cambia esaki pa un nobo. Kiermen, e personanan cu tin un paspoort vigente, no mester di otro paspoort nobo. Pero esun cu ta interesa pa un paspoort nobo, por acerca na nan oficina. Nan ta pidi tres rekisito basico: Cedula Colombiano, paspoort anterior y deposito bancario di pago. Unabes cu e proceso ta wordo diligencia den e consulado, e documento ta tarda 7 dia pa e ta cla.
Segun censo di Aruba, tin alrededor di 15 mil Colombiano bibando riba nos isla. P’esey, gobierno di Colombia su politica exterior, tin interes riba nan compatriotanan cu ta biba afo di nan teritorio nacional. Nan a expande nan oficinanan consular den exterior. Di e forma aki, nan ta brinda un miho servicio na e comunidad Colombiano pafo di nan pais natal.
E paspoort nobo tin e mesun prijs di 145 dollar, cu ta e mesun prijs cu ta wordo cobra pa cada paspoort den exterior. E paspoort nobo ta un version cu ta pas mas cu e standard di siguridad cu ta wordo exigi internacionalmente. E consul a bisa cu pa medio di introduccion di un paspoort nobo, basicamente loke nan ta haci ta reforsa e datonan di siguridad di e documento aki, dilanti autoridad di inmigracion.
Celebracion Dia di Colombia
Consulado di Colombia ta extende un invitacion general, pero muy specialmente na nan compatriota, pa celebra hunto e di 208 aniversario dia di independencia di Colombia, diabierna awor.
“Nos kier invita tur nos paisano y tur persona residente na Aruba, di cualkier nacionalidad, pa compaña nos den un fecha tan significativo pa Colombia”, consul Gnecco a bisa.
Dia 20 di juli nan organisa un evento special como homenahe y solidaridad cu e victimanan di e conflicto arma na Colombia. Diabierna awor pa 5:30 di atradi lo tin un ceremonia protocolario di ofrenda floral na plaza Bolivar. Despues nan lo realisa un marcha di paz y reconciliacion fei Plaza Simon Bolivar te Cas di Cultura. Nan kier comparti y haci un homenahe na e famianan di e victimanan di e conflicto arma na Colombia cu ta residencia na Aruba.
Na Cas di Cultura nan lo presenta totalmente gratis un obra di teatro bou encargo di John Fredy Montoya y Maria Teresa Martinez. E ta un monologo bou e titulo na Spaño: ‘Nunca Mas’.
Tambe nan lo realisa un homenahe na e feliz memoria di e escritor Colombiano y premio Nobel di Literatura, Gabriel Garcia Marquez. Tambe lo tin un intercambio di palabra entre e personanan presente. Na final lo tin un obra musical y un baile tipico Colombiano. Nan lo entrega un obsekio na esunnan presente y tambe lo tin un brindis den cuadro di Dia di Colombia.
