Riba rednan social y tambe algun medio di comunicacion den e ultimo dianan a bin dilanti e caso di e terminacion di contract di parti di OE AZV pa cu e Dokter Eugene Boderie, caminda tambe Huisartsen Vereniging Aruba (HAVA) a publica un carta cu e dokter mes a manda, lagando preguntanan den comunidad riba pakico AZV no kier renoba su contract.

Recientemente AZV a manda un comunicado na prensa indicando cu AZV ta fortificando e prome liña di cuido pa medio di ampliacion cu mas dokter di cas y praktijkondersteuners.

Den e comunicado ta señala cu aña 2024 ta bayendo positivo y esaki ta duna Organo Ehecutivo AZV (OE AZV) e espacio financiero pa ehecuta varios proyecto. Un di e proyectonan importante aki ta esun di dokter di cas. OE AZV ta percura pa fortifica e prome liña di cuido cu mas dokter di cas y praktijkondersteuners. No ta un secreto cu mundialmente por mira un escasez di expertonan medico, incluyendo dokter di cas. Sinembargo, contrario na varios otro isla ruman manera Boneiro, Corsou, Saba y Sint Maarten, Aruba ta e unico isla den region cu ta dispone di su propio sistema di educacion (specialisacion) pa dokter di cas continuo cu resultado positivo. Ta danki, entre otro, na e sistema di educacion aki cu Aruba na final di 2024 lo conta cu alrededor di 50 dokter di cas.

Nan tambe a anuncia cu awor e aseguradonan tin mas opcion compara cu algun añanan pasa pa motibo cu a habri mas oficina di dokter di cas nobo manera na districto di Noord. Sinembargo, tambe nan a anuncia e terminacion di contract cu algun dokter, entre nan, esun di dokter Eugene Boderie, ken a cuminsa eherce su profesion como dokter di cas dia 28 di januari 1983 y tin 41 aña den servicio pa comunidad.

E anuncio aki no a cay den bon tera pa algun dokter, incluyendo e mesun Dr. Boderie, ken a manda un carta indicando su desacuerdo cu e decision aki:

“Despues di mas di 41 aña mi ta wordo forsa pa termina mi trabou di Dr. di Cas. AZV no kier extende mi contracto cu nan mas. Esey lo nifica cu 31 di augustus lo ta mi ultimo dia como dr. di cas. Na prome instante nan a bisa cu nan a pensa (sin puntra) cu lo mi kier disfruta di mi pensioen, aunke dos aña pasa m’a bisa cu mi kier sigui 5 aña mas, nan a bisa pa un aña so. Aña pasa nan a bolbe puntra, m’a bisa nan cu mi kier sigui 4 aña mas, atrobe nan a bisa un aña so. E aña aki nan no a ni tuma contacto of puntra kico mi intencion lo ta. Nan ta bisa cu no tin luga mas pa mi sigui traha. Den e mesun combersacion nan ta pidi si, si mi ta interesa pa traha den HOED na ImSan, kiermen e edad no lo ta motibo. Y cu nan tin problema pa bezetting di e HOED cu suficiente dokter te casi final di 2025.”

“Den e siguiente reunion nan a keda para riba e punto cu mi no lo por sigui traha, y atrobe a puntra si mi lo ta interesa pa traha den HOED ImSan. Mi a bisa cu si ami no lo por sigui cu mi praktijk, mi tin un dokter cu ta traha basta aña na Aruba caba, y a traha varios biaha den mi praktijk ora di vakantie pa sigui cu mi praktijk. Esey nan no kier! E ora por lo menos e assistent di 20 aña largo lo keda, cu tambe tin hopi conocemento di e caracteristicanan di pashentnan pa facilita e cambio di dokter. Pa ami sigui traha den mi praktijk nan ta bisa mester baha cu pensioen, pero pa traha na HOED si por haya contract! Nan a bisa nan ta trahando riba e HOED pa dos aña caba! Tanten cu nan no tabata cla, si mi por a sigui, pero awor nan mester mi pashentnan pa yena e HOED! P’esey ami no por sigui y un otro dokter no mag di tuma over tampoco. Director di AZV ta nenga di reuni of sinta na mesa cu mi. AZV no tin e bienestar di su pashentnan como prioridad.”

Di mesun manera, el a sigura cu “Dokternan di cas cu a haci e huisartsenopleiding di Aruba na Aruba, no mag tuma over y ta ser obliga pa traha den HOED, y si no tin suficiente dokter, ta busca dokternan di afo of duna dokter cu tin mas aña cu pensioen contract pa traha den HOED. Medisch esey lo por, pero dokter di cas ta mas cu esey so. Como dokter di cas bo ta cuminsa traha y sigui pa hopi aña pa siña conoce bo pashentnan, circunstancianan, familiarnan, aspectonan social etc.; tur ta importante pa duna bon cuido.”

Pa finalisa, Dr. Boderie a sigura cu gobierno, specialmente minister di Salubridad, Dangui Oduber mester ta na altura di esaki y “ta permiti cu esey ta futuro medico di dokter di cas na Aruba. AZV, antes e orguyo di Aruba, ehemplar pa otro paisnan, mester a yega asina leu. Mas tanto ta wak cu organisacionnan cu tin monopoliepositie tin tendencia di cambia cu caracteristica dictatorial, aunke na comienso HAVA a ser garantisa door di e gerencia e tempo ey cu esey no lo pasa, y semper lo keda cu respet pa e zorgverleners cu na final ta keda e ‘backbone’ di nos sistema medico cu tin na Aruba.”

Manera tabata di spera, esaki a trece como consecuencia reaccion di diferente persona, por ehemplo, di dokternan mes manera Israel Posner, ken riba su red social a publica cu e ta apoya Dr. Boderie: “Pakico no renoba contract di un profesional keri? Ta un cos no comprendibel cu AZV a scoge pa no renoba e contract di dokter Boderie. Despues di mas cu 41 aña di servicio, dokter Boderie a demostra cu e ta un profesional excelente, bon funcionario y keri na Aruba. El a yuda un cantidad grandi di pashent cu dedicacion y experticio, y su contribucion na e comunidad ta di balor incalculabel. Pakico AZV no kier renoba e contract cu un dokter tan respeta? Nos ta duna dokter Boderie un danki di curason pa su hopi aña di dedicacion y esfuerso. Bo trabou a tin un impacto profundo riba e bida di hopi hende y bo lo haci falta hopi. Bo añanan di servicio ta merece tur aprecio,” e post a sigura.

Cierto ta cu su pashentnan ta lamenta e decision di AZV sigurando cu nan ta traha pa paga un AZV premie y cu nan tin derecho pa reclama y exigi ora casonan asina aki ta tuma luga.

Bon Dia Aruba a tuma contacto cu AZV su vocero, pa asina ey haya sa si nan tabatin un reaccion pa loke ta e carta cu Dr. Boderie a duna di conoce, nan a indica cu nan lo no manda ni duna un reaccion riba esaki.

Tambe a tuma contacto cu presidente di HAVA, Dr. Joaquin van Tright, pero tampoco a logra haya un contesta di dje te ciere di edicion aki.

Dia 31 di augustus, manera a ser anuncia caba, ta ultimo dia di Dr. Boderie como dokter di cas na Aruba.

Potret di Dr. Boderie ta pertenece na HAVA su Facebook page den cual a celebra su 40 aña di servicio como dokter di cas na 2023.