“Mescos nos tur ta haya un evaluacion riba nos funcionamento, dokternan di cas y specialista tambe mester tene cuenta pa e calidad di cuido cu nan ta duna ta na un bon nivel. Y si no ta asina, un dunado di trabou mester por intermedia pa drecha e situacion.”

Minister encarga cu salubridad, Dangui Oduber (MEP) ta anuncia cu lo bin cambionan den sistema di cuido na Aruba cu meta pa mehora calidad di cuido den e sistema. Durante un conferencia di prensa, sr. Oduber a duna di conoce cu ta trahando riba un concepto digital y moderno pa clientenan y pashentnan di dokter di cas por evalua personalmente e cuido cu nan a keda ofrece na nan. Nan lo introduci e concretisacion di e cambio aki den proximo 3 lunanan.

“Mi ta kere esaki ta na beneficio pa tur asegurado di AZV cu ta haci uzo di servicio y cuido medico na Aruba.” Loke a conduci e mandatario na anuncia e tipo di innovacion aki ta cu actualmente ta investigando na departamento di prome auxilio na hospital (eerste hulp) cua ta e oranan cu ta mas pisa y ora tin mas trafico bou e seccion aki.

E resultado preliminario di e estudio ta mustra cu e oranan unda tin mas trafico ta netamente entre 8or di mainta pa 5or di atardi, cual ta un orario unda un pashent normalmente tin acceso na su dokter di cas. “Kico e conclusion por indica?”, sr. Oduber ta puntra, pero ta contesta alabes: cu den su concepto e dokternan di cas no ta ‘dje accesibel ey durante e orario aki’.

Sr. Oduber ta señala cu mundialmente tin 3 factor cu nan ta uza pa midi calidad di sistemanan medico. Esaki ta encera calidad di cuido brinda pa profesionalnan, cual ta inclui personal di oficina y triage, disponibilidad di e cuido medico y cu e cuido mester ta pagabel.

‘AZV no ta midi servicio dokter di cas’

Durante e ultimo 3 lunanan e mandatario a tene reunionnan cu varios instancianan den cuido medico na Aruba, manera hospital, Imsan, AZV y mas unda tabata remarcabel cu AZV no ta midi e calidad di servicio cu dokter di cas ta brinda.

Loke si nan ta midi relaciona cu calidad di servicio ta segun e minister cu ta compara e cantidad di recetanan cu ta produci pa tur dokter di cas cu otro. Nan ta haci un evaluacion mescos cu e cantidad di verwijsbrief cu e dokternan ta duna compara cu otro.

Manera nos a trece dilanti siman pasa despues di un conferencia di prensa na AZV, asociacion di dokter di cas na Aruba (HAVA) ta di opinion cu pashentnan no por haya verwijsbrief solamente pasobra nan ta sinti cu nan tin derecho riba dje. Un di e puntonan cu nan a trece dilanti ta cu a pesar di yena e lista di espera pa specialista di mas, e specialista mes lo toca riba dede di dokter di cas pa cuanto verwijsbrief e duna.

Sinembargo esaki no ta tene cuenta cu tur e kehonan cu ta aparece riba medionan social, pero tambe den prensa riba e calidad di servicio brinda pa profesionalnan di cuido na Aruba.

Pues e minister kier cambia e manera cu ta evalua servicio brinda den sistema medico por medio di duna e pashent mes por duna un score riba e calidad di servicio cu el a haya na su dokter di cas. Na momentonan actual tin mas o menos 45 dokter di cas.


App y website pa evalua cuido

Pa pashentnan mes por evalua e servicio di cuido brinda, gobierno ta propone pa bin cu un app y un website unda lo brinda posibilidad pa score dokter di cas riba diferente indicador di calidad di servicio.

E rating lo ta riba e area di recepcion, e personal di recepcion y e facilidad cu e dokter di cas ta ofrece na momento cu haya un cita. Pues aki ta trata netamente e fenomeno cu presidente di HAVA a señala unda ta posibel cu pashentnan ta sinti neglisha ora dokternan ta hopi ocupa y no ta atende detayadamente cu pashent.

Es mas, e servicio cu nan brinda e pashent mes claro lo ta un punto cu por score y tambe e tempo di espera necesario pa haya acceso na e dokter di cas. E rating ta bay riba un escala di 1 pa 5 strea. Pa persona cu no tin telefon inteligente of cu no ta bon cu tecnologia, un website tambe lo ta disponibel pa haci uzo di e servicio aki.

Efecto di rating negativo

Ora un dokter di cas su rating ta hopi abou y ta mira cu e dokter no ta funcionando di manera optimal, AZV lo sinta hunto cu dokter di cas pa asina wak kico ta bayendo fout.

E proyecto piloto aki lo inclui eventualmente boticanan, eerste hulp y tambe specialistanan, pero mirando cu dokter di cas ta e prome contacto cu tin cu sistema medico, lo cuminsa cu e proyecto aki ey.

Manera ta conoci, dokter di cas no ta haya pago a base di pashentnan trata, si no ta haya un suma mensual di AZV pa nan servicio por medio di un contract cu ta firma entre nan. Pues si mester bay asina leu pa tuma medidanan contra un dokter di cas cu ‘luna tras di luna’ no ta brinda un servicio cu ta spera di dje, tin posibilidad pa evalua e contract cu nan tin cu AZV. E mandatario a señala mescos cu tur persona den sociedad, dunado di trabou mester por trece nan trahado su atencion na un problema di prestacion cu nan lo tin pa loke ta trata e calidad di servicio duna.