Na mesa di redaccion di Bon Dia Aruba a yega informacion di un ciudadano preocupa, ya cu maneho di AZV ta lagando su bida na peliger. Segun e pashent, tin un lista di espera di un aña pa e por haya un mashin di oxigeno.
E ciudadano, kende a pidi pa keda anonimo, a conta cu recientemente el a keda diagnostica cu sleep apnea.
Segun Mayo Clinic di Merca, sleep apenea ta un desorden di soño potencialmente serio, den cual rosea ta stop ripitidamente y ta start back.
E sintomanan mas comun ta inclui roncamento duro, episodio unda ta stop di hala rosea durante cu ta drumi – esaki mester keda observa pa otro persona; lanta cu boca seco, dolor di cabes mainta, dificultad pa keda drumi (insomnia); cansancio excesivo durante dia (hypersomnia); dificultad pa pone atencion mientras ta lanta; iritabilidad.
Ta enfatisa cu esaki ta un condicion serio, cu por tin consecuencia negativo riba salud. Ta menciona entre otro cu por ocasiona presion halto of problema di curason, diabetes, problema di higra, y problema cardiovascular. Pues ta importante pa tuma accion trempan y ricibi tratamento pa asina preveni cu e sleep apnea ta ocasiona mas problema di salud.
E ciudadano a conta Bon Dia Aruba cu el a keda diagnostica cu sleep apnea despues di a haci un test na cas mientras tabata drumi. Dokter a indica cu e mester di un mashin special cu lo yud’e keda haya oxigeno mientras ta drumi. Sinembargo, a informa e pashent cu e mester warda henter un aña prome cu e mashin cu e mester bira disponible. Esaki a causa hopi preocupacion mirando e riesgonan cu e persona ta core pa su salud y cu por pone hasta su bida na riesgo.
Mientras cu gobierno ta celebrando e surplus den presupuesto cu ta bay inverti den tanto proyecto, e ciudadano ta cuestiona pakico ta laga ciudadanonan sufri di salud y pone nan propio bida den peliger? Pakico den e inversion no por inclui suficiente mashin pa e pashentnan cu tin mester di esaki?
