Durante un entrevista cu redactor di Bon Dia Aruba a haci cu Edwin Jacos, director di AZV, a bin dilanti e topico di lista positivo di remedi. Sinembargo, ora ta trata di pashentnan cu malesa cronico of den caso di polyfarmacie, algun di nan a confronta cu e noticia cu AZV no ta cubri e remedinan aki mas, y cu nan mester paga pa nan.

Pa esaki, Jacobs a señala cu tur remedi cu ta riba e lista positivo ta wordo cubri pa AZV. Si e remedi no ta riba lista positivo, e unico forma cu por wordo cubri ta den loke nan ta yama e lista di “criteria”. Esey ta nifica cu pa e pashent por haya remedi, mester cumpli cu cierto criteria.

“Esaki ta un otro sistema, algun di remedinan cu a wordo saca for di e lista positivo a pasa bay riba e lista di criteria. Esaki basicamente pa uso cronico tanten cu no ta remedinan cu ta over de counter – esey ta remedinan cu nos no ta cubri mas. Ora un persona ta yega na Botica bay den reki y pikie”, el a bisa.

Tambe tin remedinan di uso temporal cu tampoco ta wordo cubri. Jacobs a haci un apelacion na tur persona cu tin duda tocante su remedinan pa tuma contacto cu AZV mes. “Nos a constata cu den e dos luna aki di implementacion di esaki cu tabatin kehonan. Nos ta monitor riba social media cu ora un persona tin un reclamo, nos ta tuma contacto cune pa wak kico ta su situacion. Tambe nos a constata cu esaki ta un cambio den bo sistema di prescribi y no ta tur dokter di cas ainda ta dominando e forma di prescribi totalmente”, Jacobs a indica.

Tambe el a trece dilanti cu nan a haya casonan unda e persona cu ta sufri di malesa cronico, cu tin derecho di haya su remedinan, ora e dokter a prescribi e mester a skirbi “CG”, cu ta nifica chronische gebruik of uso cronico, y algun dokter no ta haciendo esey.

E ora ey pashentnan tin cu paga nan remedinan debi na esaki. Nan a ripara tambe cua ta e consultorionan, unda nan tin un plan pa bay acerca e consultorionan pa haya sa kico ta pasando. “Mi ta kere cu mas y mas nos ta avansa den tempo, e dokternan cu ta prescribi ta cuminsa capta mas lihe kico tin cu haci y esey por wordo stabilisa den cuater of cinco luna”, Jacobs a comenta.

Pa finalisa, esnan cu tin malesa cronico ta bay keda haya nan remedinan pa cu esey, pero si e ta pa uso temporal no, manera el a expresa.