Sur Korea a anuncia miles di caso di coronavirus den solo un par di dia prome cu fin di februari. E aumento di casonan specialmente a centralisa den un principal grupo di un misa na ciudad di Daegu.
E contagio desde inicio a pusha e cifra di casonan confirma na Sur Korea hopi mas halto cu den otro luga pafo di China y e casonan eynan a sigui aumenta dia pa dia.
E virus a ser confirma pa prome biaha den e pais aki dia 20 di januari, ora un muhe Chines di 35 aña cu a biaha pa Wuhan, China specificamente na aeropuerto internacional di Incheon, cu ta sirbi pa Seoul, el a keda isola ora el a drenta den e pais.
Cuatro siman despues, Sur Korea a logra evita un importante contagio cu 30 persona so, aunke nan tabatin contacto cu hopi hende mas cu despues a confirma cu nan tabata malo y centenares di persona mas identifica como contacto di e pashentnan malo. Tur esaki a cambia cu e aparicion di ‘Pashent 31’.
Te ainda no a ser aclaria na unda e pashent 31 a wordo infecta cu e virus, pero dianan prome cu su diagnostico, el a biaha pa luganan hopi frecuenta na Daegu, asina como Seoul e capital. Dia 6 di februari el a haya un accidente chikito di auto na Daegu y a registra na un hospital di medicina oriental.
Mientras e tabata den hospital, el a asisti na un misa di Shincheonji di Hesus dia 9 di februari y atrobe dia 16 di februari. Importante ta pa bisa cu su religion ta obliga su siguidonan pa asisti pa su celebracionnan a pesar di cualkier malesa.
E dokternan a sugeri pa e haci un test di deteccion di coronavirus, pa motibo cu e tabatin kentura hopi halto. Pero el a nenga y a dicidi di bay na un hotel y come cu un amigo. Otro dia el a asisti pa un casamento, como tambe a bay un funeraria.
Sinembargo, a medida cu e sintomanan a cuminsa bira pio, dokternan a bisa un biaha mas pa haci e test, cual el a acepta y e dia despues e resultado tabata positivo. Autoridadnan a informa cu e tabata e caso #31 confirma na e pais.
Despues di tur esaki y debi na su actividadnan, dianan despues e cantidad di caso positivo a cuminsa aumenta ora centenares di persona di e iglesia Shincheonji y su alrededor a cuminsa duna positivo. E tempo ey, e cantidad di caso den e pais a subi di 30 pa 977.
Centro pa Control y Prevencion di Enfermedadnan di Korea (KCDC) a haya inicialmente un lista di 9.300 persona cu a bay pa e dos servicio religioso di e iglesia aki, di cual 1.200 a keha di tin e sintomanan similar di un grip. Miles di caso a ser confirma eynan.
Otro grupo mas chikito a surgi di un hospital cerca di Cheongdo, cerca di Daegu. Autoridadnan ta investiga e relacion entre e misa di Daegu y e servicio funerario den hospital, na cual a asisti varios miembro di e iglesia desde e 31 di januari te 2 di februari. Si esaki keda confirma, e pashent 31 por tin vinculo cu e dos grupo.
Desde 18 di maart, e grupo di Shincheonji ta representa por lo menos 60% di tur caso na Sur Korea. Autoridadnan ta investiga con pashent 31 a haya e virus, pa motibo cu e no tin un registro reciente di biahenan na exterior of contacto cu otro casonan confirma.
E mesun dia, e grupo di Shincheonji a informa cu tabatin 5.016 persona infecta cu COVID-19, asina tambe a desaroya den gruponan mas chikito na Sur Korea como misanan, hospitalnan y residencianan cu ta representa mayoria di e grupo di infeccion.
Den casi tur ciudad principal y provincia a registra algun infeccion Presidente di Sur Korea Moon Jae-in a declara e ciudad di Daegu y algun parti di e provincia di Gyeongsang como “zona special di desaster”.
Esaki ta e prome biaha cu Sur Korea ta declara un region como zona di desaster pa un enfermedad infeccioso y bao e condicion aki, e gobierno por subsidia te 50% di e gasto di restauracion y dispensa e residentenan di impuesto y pago di servicio publico.
E pais a experimenta un caida den e cifranan di casonan nobo. Esaki ta produci despues cu a identifica e mayoria di casonan di infeccion masivo cu vinculo cu e miembronan di e iglesia. Sur Korea a bin tratando centenares di persona y ta investiga operador posibel como detective, utilisando e tecnologia di telefon y satelite.
