Ayera durante un conferencia di prensa Paseo Herencia a anuncia e di dos atleta cu a keda selecciona pa e programa Gifts of Sports.

Paseo Herencia tin varios aña caba ta yudando studiante y deportistanan. Nan a cuminsa inicialmente cu e proyecto di Gift of Education nuebe aña pasa pa yuda hobennan cu nan gastonan di nan estudio.

Den 2023, Paseo Herencia a introduci e programa Gift of Sports, cu ta enfoca riba yuda hobennan atleta pa competi na nivel internacional. E programa aki ta pa motiva e hoben deportistanan di Aruba, pa un dia nan por sigui e pasonan di streanan grandi manera Xander Bogaerts y Sarah-Quita Offringa, cu ta forma parti di Paseo su Wall of Rising Stars y Walk of Fame.

E proceso a cuminsa na juni na momento cu a habri aplicacion pa e programa y a haci invitacion na atleta di 12 aña bay ariba pa manda nan curriculum deportivo y un video creativo. Hunto cu e comision a haci escogencia di e atleta Wyndel Beyde. Su video y curriculum largo den e deporte di atletismo a impresiona e comision y danki na su compromiso y dedicacion pa su deporte a haci cu el a keda selecciona como e segundo atlete pa e programa Gift of Sports.

Wyndel Beyde, un atleta di seleccion nacional di atletismo di Aruba cu enfoke specifico riba coremento di distancia 1500m, 3000m y 5000m ya a lanta atencion na nivel internacional. Su dedicacion y disciplina inmenso pa su deporte y su meta fiho pa futuro a impresiona Paseo Herencia.

Wyndel a cuminsa practica atletismo cu 5 aña. Ya cu su 10 aña a sa di forma parti di e seleccion di atletismo di Aruba. Wyndel a logra varios medaya tanto na Aruba como internacional. Wyndel tambe tabata e White Jersey Champion di Patrishi Sports pa 3 aña sigui (2020, 2021, 2022).

Na inicio di 2024, Wyndel a representa Aruba den e weganan CARIFTA na Grenada, caminda el a gana dos medaya di plata pa Aruba despues di 16 aña y e a haya e nomber di “Silver Boy.” Wyndel a caba di representa Aruba na e World Championship U20 na Lima. Wyndel ta e prome atleta Arubiano di distancia cu ta competi na e Worlds U20 y a sa di pone un Personal Best memey di e grandinan di mundo. (4:09.45). Wyndel ta train bou di su coach internacional William Diaz di Colombia y sigur hunto nan tin plannan grandi sigui desaroya den atletismo.

Anecy Toussaint, mama di Wyndel, a conta cu na un principio e no tabata na altura di e inscripcionnan pa e programa Gift of Sports. Faltando apenas un siman pa e inscripcion cera conocirnan a bis’e pa e inscribi y purba su suerte.

Asina nan a cuminsa move tur piesa pa por a haci posibel entrega e video creativo di tur su logronan hunto cu su curriculum deportivo. Sin pensa cu e lo tin e suerte di keda selecciona, a manda e inscripcion pa Gift of Sports.

Mama di Wyndel a expresa su emocion pa a ricibi e noticia cu su yiu a keda selecciona. El a splica cu biaha como mayor cu un menor di edad tambe ta gasto. “E proyecto riba su mes ta un proyecto cu Aruba mester brasa…danki Paseo pasobra e lo yuda den un parti hopi grandi pa e sigui desaroya,” el a resalta.

Valery Pieters-Camacho, Marketing Coordinator di Paseo Herencia a expresa su felicidad tambe pa yama Wyndel bon bini den e famia di Paseo. “Nos a bis’e cu nos lo sigui apoy’e. Tanten cu e sigui den su disciplina di deporte nos lo sigui apoy’e. Nos ta hopi orguyoso di forma parti di su ekipo di apoyo y ta hopi emociona pa e yega pronto na e Wall of Rising Stars di Paseo Herencia,” el a resalta.

Paseo Herencia ta orguyoso di por duna sosten na Wyndel den su carera deportivo y ta confia cu su trabou duro y perseverancia lo sigui trece orguyo pa Aruba. Su logronan te cu awor ta un testimonio di su potencial, y Paseo Herencia ta spera cu e lo logra hopi exito mas na e escenario mundial.