Un compania kier usa un balloon avansa pa bula clientenan for di superficie di Tera na Alaska, na e punto mas halto di atmosfera terestre.
E startup Space Perspective basa na Florida tin plan pa usa e Pacific Spaceport Complex na Kodiak pa sirbi como un di e sitionan di lansamento pa e vehiculo, yama Spaceship Neptune, segun Anchorage Daily News a reporta diadomingo.
E paseo riba balloon lo ta maneha pa un tripulacion di vuelo hibando ocho pasahero den un capsula di presion suspendi bou un balloon di hydrogeno tamaño di un stadion di futbol. Cada pasahero lo por paga alrededor di $125mil pa un biahe di seis ora.
Mark Lester, CEO di Alaska Aerospace Corp., a bisa cu e paseonan lo ta disponibel for di Kodiak aki algun aña y lo sostene turismo na Alaska. “Lo tin hende for di tur skina di mundo cu lo kier bin Alaska y mira Aurora Borealis for di rand di espacio”, Lester a bisa.
Alaska Aerospace y Space Perspective lo test y refina operacionnan di port espacial y sigura licencia di vuelo espacial for di Administracion Federal di Aviacion. Space Perspective ta spera di completa un vuelo test sin tripulacion for di Shuttle Landing Facility na Centro Espacial Kennedy di NASA na Florida proximo aña.
