Pasco sin ayaca…

Venezuela den crisis mas grandi di su historia

Un frase masha simpel di tres palabra; sin embargo su tras tin scondi e tragedia mas grandi cu nos bisiñanan a yega di pasa aden. Pa lunanan largo caba ta anticipa e colapso total di e sistema economico di Venezuela, cu e pregunta grandi kico ta bay sucede. Aunke (felizmente) cos no a yega asina leu ainda, e señalnan di falta di abastecemento di producto basico a bira asina grave, cu ta mustra cu e desesperacion pa falta di nutricion y di remedi ta birando dia pa dia mas insoportabel. Mayornan cu ta dispuesto di regala otro hende nan yiu, cu e speransa cu nan si lo por duna e criatura loke e mester y merece. Mortalidad aumenta den casnan di anciano pa motibo di desnutricion y pa falta di remedi. Familiarnan na Aruba y Curaçao cu ta haya peticion urgente di nan hendenan na Venezuela pa yuda cu remedi, cu nan no por haya mas na nan pais. Asaltante cu ta mas interesa den loke tin di come den cas cu den placa mes. Hende cu ta cera cabes pa asalta truck di cuminda prome cu nan yega na e supermercado cu nan mester abastece. Tin hopi mas noticia asina cu ta yega na nos oido o bista, pero tin hopi cu no ta sali publica mes. Como trahadonan di prensa nos redaccion, al igual cu di otro medionan, nos si ta mira nan. Tambe esnan cu ta custumbra di busca noticia riba e rednan social ta mira e señalnan aki. Loke a pasa e siman aki tabata e mecha cu e situacion tabata mester pa rementa. E locura completo di exigi di tur hende di entrega nan biyete di 100 bolivar na dos oficina di Banco Central: un na Caracas, un na Maracaibo. Si nan no entrega na tempo, nan ta keda cu un papel totalmente sin balor den nan man! Esaki den un pais di 30 miyon hende! Na hopi luga e multitud no a keda sumiso mas y a cuminsa actua. Nos por a mira siman cu a pasa con e multitud cu kier a crusa brug bay Colombia a pone autoridad uniforma un banda, a coy e waya cu tabata obstaculisa acceso pa e brug benta esaki den awa y a simplemente bay nan caminda. No tabatin intervencion, ni cu arma, ni cu gas lagrimogeno, nada. Riba internet ta circula video di militarnan den grupo ta para wak con un multitud ta sakea un negoshi y ta cana bay cu mercancia, mientras e militarnan ta para na otro banda di caya, bon arma, pero pasivo.

Esey ta bisa hopi. Na prome luga esey ta significa cu por ta nan no ta sigui orden gubernamental pa mantene orden a la fuersa. Of nan a haya orden pa no actua… Loke no ta mustra logico pasobra na otro luga y na otro momento si forsanan arma tabata actua contra e vandalonan cu tabata hiba cuanto un cos cu nan a topa den nan caminda. E situacion mas grave tabata na Ciudad Bolivar, unda ta calcula cu un 450 negoshi a keda desbarata. En todo caso e sucesonan di e siman cu a pasa ta mustra cu no tin unidad di actuacion cerca e cuerponan uniforma mas. Por ta cu entre e militarnan, cu tambe tin famia, no tin acuerdo pa sigui ciegamente tur capricho di e regimen socialista, cu a logra destrui e economia di e pais totalmente? Por ta cu esey a haci cu e presidente chavista a cambia di idea y a pospone su plan lunatico te inicio di aña nobo? No cu esey ta bay resolve algo, pasobra e situacion di nutricion no ta bay mehora. E no por mehora si e pais mes no ta produci y no tin placa pa cumpra tanto alimento den exterior. Ademas e destruccion di e canalnan normal di benta cu e gobierno socialista ta pretende di desarma, mientras cu nan sistema di abastece socialista ta un gran fracaso, ta contene riesgo grandi pa acceso na cuminda di miyones di hende.

Y, mientras tanto ta sigui cu un dialogo cu no ta logra nada, mas cu tur cos pasobra gobierno no kier cumpli cu loke a acorda te awor. Gobierno ta anuncia cu entrante 2017 nan ta bay disolve asamblea cu ta den man di oposicion. Oposicion ta bisa cu nan ta bay tuma resolucion den asamblea contra presidente pa incumplimento. Mientras e politiconan ta pleita cu otro ta ken ta manda, e berdad ta cu e caminda pa caos total ta hancho habri, mientras cu pueblo a cuminsa ripara cu accion riba caya tin exito. Ora hende cuminsa ripara cu e supuesto ‘monopolio riba arma’ cu tur gobierno mester tin via su cuerponan uniforma no ta funciona mas, ora cu miedo bay pasobra desesperacion a bira mas fuerte, anto nos ta cerca di un explosion final. E unico cos cu por para e proceso aki no ta dialogo djis pa dialoga. Mester bin un acuerdo di rescate cu ta percura pa pueblo tin acceso na producto di prome necesidad. No tin tempo mas pa keda posterga decision.